Трамп яна "қовун туширди"
АҚШ Президенти Дональд Трамп ўзининг "Твиттер"даги саҳифасида учта аксилмусулмон видеони тарқатгани танқидларга сабаб бӯлди.
Бу видеолар Британиядаги "Britain First" ("Британия биринчи ўринда") ўнг қанот ташкилотининг раҳбари ўринбосари Жайда Франзен томонидан тарқатилган эди.
Президент Трампнинг "Твиттер"даги саҳифасида эълон қилинган биринчи видеода мусулмон мигрантнинг қўлтиқтаёқда юрган Ҳолланд ўсмирини ургани тасвирланган.
Жайда Франзеннинг иккинчи видеосида мусулмоннинг Бокира Мария ҳайкалини уриб синдираётгани акс этган.
Учинчи видеода 2013 йилдаги Мисрдаги тартибсизликлар пайти бир инсоннинг Александрия шаҳридаги бино томидан ташлаб юборилгани акс этган.
Британия расмийлари АҚШ президентининг ретвитини кескин танқид қилдилар.
Британия Бош вазири маъмурияти Дональд Трампнинг бу иши нотўғри бўлди, дея муносабат билдирган.
"Britain First" ёлғонни тарқатмоқда ва тарангликни келтириб чиқармоқда", деб айтган Бош вазир Тереза Мэй вакили.
"Britain First" - радикал ўнг қанот Британия Миллий партияси (BNP)нинг собиқ аъзолари 2011 йили ташкил қилган ташкилот.
Бу ташкилот Интернет социал тармоқларида "Британия исломийлашиб бораётгани ҳақидаги" провокацион чиқишлари билан ўзига кўпчилик эътиборини жалб қилган.
"Britain First" парламент сайловларида иштирок этиш мақсадини кўзлаган. Ташкилот дастурининг асосий нуқтаси - аксилиммиграцион сиёсат.
Жайда Франзеннинг "Твиттер"да 52 мингдан ортиқ муштарийлари бор. У Дональд Трамп ўзининг видеоларини ретвит қилганидан хурсанд бўлиб кетган.
Президент Трамп ретвитидан кейин Голландиянинг АҚШдаги элчилиги муҳожир мусулмон деб тақдим қилинган инсон Голландияда туғилиб ўсган киши бўлгани ва бу қилмиши учун жазога тортилгани ҳақида "Твиттер"да хабар тарқатган.
Президент Трамп Британия Бош вазири Тереза Мэй баёнотига муносабат билдирган, "менга эътибор қаратгандан кўра, Британияда ўрнашиб олаётган қўпорувчи радикал исломий терроризмга эътибор қаратинг" дея "маслаҳат берган.
Президент Трампнинг бу иши ўзаро нафратни янада қўзғаши ҳақидаги баёнотлар тобора кўп тарқалмоқда.
