ЖЧ-2018: Саудиялик футболчиларни олиб кетаётган самолётда ёнғин чиқди
Жаҳон чемпионатида иштирок этаётган Саудия Арабистони футбол жамоасини навбатдаги мусобақага олиб кетаётган самолёт Ростов –на-Дону шаҳри аэропортига қўнаётганда ёна бошлади. Расмий хабарларга қараганда саудиялик футболчиларга зарар етмаган.
Расмийларнинг билдиришича, Санкт-Петербургдан учган Россияга қарашли A319 аэробусининг двигателларидан бирида қисқа муддатли ёнғин юз берган.
Дастлаб самолёт эгаси бўлган “Россия” авиаширкати бу маълумотни рад этган эди. Авиаширкат двигателнинг ишдан чиқишига ёнғин эмас, самолётга урилган қуш сабаб бўлганини билдирган.
Саудия терма жамоаси 20 июнда Ростов-на-Дону шаҳрида Уругвайга қарши майдонга тушади.
А гуруҳида иштирок этаётган Саудия Арабистони жамоаси жаҳон чемпионати расман очилган 14 июнда биринчи ўйини Россия билан ўтказган эди. Россия Саудия устидан 5:0 ҳисобида ғалаба қозонган.
