Имом Фазлиддин Парпиев ҳозир қаерда? (ВИДЕО)
Ижтимоий тармоқларда "Имом Фазлиддин ҳижрат қилди" номли видеолавҳа пайдо бӯлди.
Тошкентнинг Юнусобод туманида жойлашган "Омина" масжиди имоми Фазлиддин Шаҳобиддин ўғли ўзининг Жума ҳутбасида рўмол ва соқол борасида мусулмонларга бўлаётган тазйиқларни қоралаган ва ҳукуматни виждон эркинлигини таъминлашга чақирган.
Имомнинг 7 сентябрь куни қилган ярим соатлик маърузасининг видео ва аудиоси унинг Фэйсбукдаги саҳифасида (Фазлиддин Парпиев) жойлаштирилди.
Жума намозига келган жамоат қаршисида гапирган Фазлиддин Шаҳобиддин ўғли мусулмонларни ўз ҳақ-ҳуқуқлари учун мавжуд қонунлар доирасида ҳаракат қилиш, жанжал ва тўполон қилмасликка даъват этган.
Унинг сўзларига кўра, мусулмонлар демократик давлатнинг қонунларига амал қилишлари керак, айни пайтда давлат ҳам мусулмонларнинг ўз қонунлари доирасида белгилаб қўйилган ҳақ-ҳуқуқларин таъминлаши лозим.
"Биз демократик давлатда яшаймиз, демократик давлат дегани шариатнинг ҳукмларини адо этмайди, лекин ўзида виждон эркинликларини киритиб қўйган кодексда, конституцияда... Шундай экан, давлат виждон эркинлигининг таъминланишини ҳам кузатиб, назорат қилиб бориши керак", - деб айтган "Омина" жоме масжиди имоми.
У мусулмонларни портал орқали Президентга мурожаат қилишга чиқарган.
"Порталга мурожаат қилиш керак, шу жойда тазйиққа учрадим, илтимос, Президент шу бўйича ўзингиз назорат қилиб, ёрдам беринг, дейсиз. Ҳал бўлса бўлди, бўлмаса ҳеч нарса қилмайсиз. Сиз динингиз учун ўзингиздан талаб қилинган нарсани қилдингиз", - деган имом 7 сентябрь куни қилган Жума ҳутбасида.
У мусулмонларнинг сўз эркинлигини ҳимоя қилган.
"Динимиз сабабидан бизга бирон озор етадиган бўлса, буни айта олишимиз керак, фикримизни баён қила олишимиз керак", - деб айтган "Омина" масжиди имоми.
