2018 йили хориждан ўзбекистонликларга 2,3 миллиард доллар пул юборилган

Йил бошидан эътиборан Ўзбекистонга 2,3 миллиард доллар пул жўнатмалари амалга оширилган. Бу ҳақда Марказий банк маълумотларига таяниб, Spot хабар бермоқда.

Йилнинг иккинчи чорагида Ўзбекистонга юборилган пул жўнатмалари ҳажми кескин ортган. Биринчи чоракда жўнатмалар ҳажми 949 миллион долларни ташкил қилган. 2018 йилнинг январь июнь ойларида Ўзбекистонга юборилган жўнатмалар ҳажми 14 фоизга ортган.

Шу билан биргаликда, экспорт-импорт бўйича ҳам ўсиш кузатилган. Шу ва бошқа кўрсаткичларга таянган ҳолда, тадқиқотчилар 2018 йилнинг биринчи ярим йиллигида тўлов баланси жорий операциялари ҳисобининг салдоси ижобий натижа кўрсатишини башорат қилмоқда.

Шу билан бирга, Марказий банкдан таъкидлашларича, ташқи шароитларнинг нисбатан яхшиланиши ва бунинг натижасида экспорт каналлари орқали валюта тушумлари ҳамда жисмоний шахслар халқаро пул ўтказмалари ҳажми ошиши, шунингдек, хорижий кредит линиялари ички валюта бозорида хорижий валюта умумий таклифи миқдорининг ўсишини таъминлайди.