Сурхондарё йўлларида постлар яна тикландими?

Сурхондарёлик бир гуруҳ фуқаролар вилоят ички йўлларида ўтган йили олиб ташланган туманлараро баъзи йўл-патруль постлари фаолияти яна қайта ишга туширилгани ҳақида ташвиш билдиришган.

Айни пайтда KUN.UZ мухбирлари Сурхондарё вилоятида хизмат сафарида бўлиб турибди. Улар мурожаатда келтирилган Термиз – Денов йўли бўйлаб ўтишган. Бироқ у ерда постлар йўқлиги, бирор йўл-патруль хизмати ходими машиналарни тўхтатиб, ҳайдовчиларнинг вақтини олиб, уларни асоссиз текшириш билан шуғулланмаётганига гувоҳ бўлишган.

Мухбирлар бу борада маҳаллий ҳайдовчиларни суҳбатга тортишганида, улар бир неча кун аввал пахта масалалари билан боғлиқ хавфсизлик чора-тадбирлари нуқтаи назаридан постлар маълум вақт ишлагани ва ҳозирда улар яна ўз фаолиятини тўхтатганини айтишган.

Айни дамда Термиз – Жарқўрғон – Қумқўрғон – Шўрчи – Денов – Сариосиё – Узун туманлари оралиғида йўл-патруль постлари фаолиятига дуч келинмаган. «Бироқ йўлда бир қанча фоторадарлар фаолияти йўлга қўйилган», деб хабар беради KUN.UZ мухбири Сурхондарё вилоятидан.

Эслатиб ўтамиз, президент Шавкат Мирзиёев 2017 йилнинг 22 декабрь куни Олий Мажлис Сенати ва Қонунчилик палатаси аъзоларига Мурожаатномасида, кўплаб йўл-патруль постлари ички туризм ривожланишига ва оддий аҳолининг ҳаракатланишига салбий таьсир этаётган омиллардан бири бўлаётганини таъкидлаб ўтган эди.