Ўзбекистонда ерлар хусусийлаштирилади

Ўзбекистонда ерларни сотиш босқичма-босқич бошланиши айтилади.

Кун.уз га кўра,  хусусан, инвестиция муҳитини яхшилаш учун қишлоқ хўжалиги мақсадларида бўлмаган ерларни давлат мулкидан чиқариб ташлаш бошланади.

Адлия вазирлиги томонидан «Қишлоқ хўжалиги мақсадларида бўлмаган ер участкаларига хусусий мулк ҳуқуқини босқичма-босқич жорий этиш чора-тадбирлари тўғрисида»ги ҳужжат лойиҳаси тайёрланди.

Ҳужжатда 2019 йил 1 июлдан бошлаб қуйидагиларни белгилаш таклиф этилмоқда:

юридик шахслар, шунингдек, якка тартибдаги тадбиркорлар - резидентлар ўзларига тегишли бўлган бино ва иншоотлар жойлашган ер участкаларини, шунингдек, уларга туташ ер участкаларини хусусийлаштириш ҳуқуқига эга;

Ўзбекистон фуқаролари, шунингдек, мамлакатда доимий яшовчи фуқаролиги бўлмаган шахслар якка тартибда уй-жой қуриш ва турар-жойга хизмат кўрсатиш учун ажратилган ер участкаларини хусусийлаштириш ҳуқуқига эга;

юридик шахслар, якка тартибдаги тадбиркорлар - Ўзбекистон резидентлари, шунингдек, мамлакат фуқаролари ер участкалари билан биргаликда хусусийлаштириш тартибида давлат кўчмас мулк объектларини сотиб олишлари мумкин.