Қорақалпоғистонда пахта ичидан одам ва тарвузлар чиқди
-
Қорақалпоғистон
Қорақалпоғистонликлар пахта ҳосилини топширишда «уддабурон» чиқиб қолдилар. Фермерлар томонидан пахта қабул пунктига топшилаётган «оқ олтин» ичидан одам ва тарвузлар борлигини кўриб, одамнинг «тарвузи қўлтиғидан тушиб кетиши» мумкин.
Қалампир.уз сайтига кўра, Қорақалпоғистон Республикаси Кегейли туманининг 3-секторида жойлашган “Халқобод пахта тозалаш” акциядорлик жамиятига қарашли “Бўз овул” фермер хўжалиги томонидан олиб келинган 2110 килограмм пахта ўлчовдан ўтказилгандан кейин кўздан кечирилганда трактор тиркамасидаги пахта орасида одам борлиги аниқланган. Бу одам трактор тиркамасидан туширилиб қайта ўлчанганда, пахтанинг оғирлиги 2020 килограмм тош босган.
“Аллияр Азамат” фермер хўжалиги томонидан олиб келинган 1426 килограммлик пахта хом ашёси ўлчангандан кейин текширувдан ўтказилганда, пахта юкланган трактор тиркамасининг остида жами 330 килограмм тупроқ солинган 5 халта ва 6 та тарвуз борлиги аниқланган.
Бош прокуратура ҳузуридаги Агросаноат мажмуаси назорати инспекцияси аниқлаган мазкур ишлар бўйича маъмурий иш қўзғатилиб, туман судига юборилган.
