Хориждан қайтган ўзбекистонликлар ОИВга мажбурий текширувдан ўтказилади
Қонун лойиҳасини қабул қилинишидан мақсад, уч ойдан ортиқ муддатда хорижий давлатларда бўлиб қайтган шахсларни ОИВ инфекциясига мажбурий равишда текширувдан ўтказишнинг қонуний асосларини яратиш ҳисобланади.
“ОИВ инфекцияси юқумли касаллик бўлиб, бемордан соғлом одамга асосан жинсий йўл орқали юқади. ОИВ билан касалланган шахснинг қони ва қон маҳсулотлари соғлом одамга қўйилганда, тиббий муолажалар стерилизация қилинмаган тиббий жиҳозлар билан амалга оширилганда, бошқа шахс ишлатган соқол олиш устараси, тиш четкаларини ишлатганда юқиши мумкин”, - дейилган ҳужжат тушунтириш хатида.
“Ўзбекистон Республикасининг “Одамнинг иммунитет танқислиги вируси келтириб чиқарадиган касаллик (ОИВ инфекцияси) тарқалишига қарши курашиш тўғрисида”ги Қонунига қўшимча киритиш ҳақида” Қонун лойиҳаси муҳокамага қўйилди.
Шу билан бирга, “Уч ойдан ортиқ муддатда хорижий давлатларда бўлиб қайтган шахсларни мажбурий тиббий кўрикдан ўтказиш чора-тадбирларини такомиллаштириш тўғрисида” ҳукумат қарори муҳокамага қўйилди.
Хорижий давлатларда меҳнат қилиб қайтган шахсларни ОИВга мажбурий равишда текширувдан ўтказиш тартиби ишлаб чиқилди.
Қарор лойиҳасида Ички ишлар, ДХХ Давлат чегараларини ҳимоя қилиш, Фуқароларнинг ўзини ўзи бошқариш органлари фаолиятини мувофиқлаштириш Республика Кенгаши бу йўналишдаги аниқ вазифалари, масъулияти белгилаб берилди.
Соғлиқни сақлаш вазирлиги фуқаронинг яшаш жойидаги тиббиёт муассасаси хорижий давлатларда бўлиб қайтган шахсларни ОИВга тиббий текширувдан ўтишини ташкил этади. ОИВга текширувдан ўтган шахслар бўйича маълумот алмашинувини йўлга қўяди.
Молия вазирлигига уч ойдан ортиқ муддатда хорижий давлатларда бўлиб қайтган шахсларни ОИВга тиббий текширувдан ўтказиш учун тест-системаларни, шприц, скарификатор, реагентлар ва бошқа сарфланувчи материалларни харид қилиш учун давлат бюджетидан зарур маблағ ажратилишини таъминлаш вазифаси юклатилади. Бунинг учун Давлат бюджетидан қўшимча 30,0 миллиард сўм маблағ ажратилишини талаб этади.
