Яқин қариндошлар ўртасида никоҳни тақиқлаш масаласининг ҳуқуқий асослари такомиллаштирилади
-
Яқин қариндошлар ўртасида никоҳни тақиқлаш масаласининг ҳуқуқий асослари такомиллаштирилади
Вазирлар Маҳкамасининг “2019 йилда қонун лойиҳаларини ишлаб чиқиш ва Ўзбекистон Республикаси Олий Мажлисининг Қонунчилик палатасига киритиш дастурини тасдиқлаш тўғрисида”ги қарори қабул қилинди.
Дастурга кўра, “Ўзбекистон Республикасининг айрим қонун ҳужжатларига ўзгартиришлар ва қўшимчалар киритиш тўғрисида”ги қонун лойиҳаси ишлаб чиқилади.
Бу Ўзбекистон Республикаси Президентининг 2019 йил 17 январдаги ПФ-5635-сон фармони билан тасдиқланган 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини “Фаол инвестициялар ва ижтимоий ривожланиш йили”да амалга оширишга оид Давлат дастурининг 166-бандида назарда тутилган.
Қайд этилишича, қонун лойиҳасида ирсий касалликларнинг олдини олиш мақсадида яқин қариндошлар ўртасида никоҳни тақиқлаш масаласининг ҳуқуқий асосларини такомиллаштириш ва бу борада тарғибот ишларини амалга ошириш назарда тутилади.
Қонун лойиҳасини ишлаб чиқиш бўйича масъул ижрочилар - Соғлиқни сақлаш вазирлиги, Адлия вазирлиги, вазирлик ва идоралар. Вазирлар Маҳкамасига тақдим этиш муддати - 2019 йил 1 июль, Қонунчилик палатасига киритишнинг тахминий муддати - 2019 йил 1 август.
