Россияда коронавирусга чалинган ўзбекистонлик вафот этди
Яқинда Москвадан Воронежга қайтиб келган, ўзбекистонлик уйда 10 кун давомида касал ҳолатда ётганидан кейин вафот этган.
Воронеж областининг коронавирус бўйича тезкор штаби расмий каналига таяниб, Кун.уз сайтининг хабар қилишича, Россиянинг Воронеж шаҳридаги 8-сонли касалхонада ўзбекистонлик 39 ёшли эркак вафот этди.
Бундан олдин ўзбекистонликда коронавирус инфекцияси мавжудлиги тасдиқланган эди.
«Бу Россияда яшаш ҳуқуқи берувчи рухсатномага эга бўлган Ўзбекистон фуқароси. У яқинда Москвадан Воронежга қайтиб келганди. Уйда 10 кун давомида касал ҳолатда ётган, 8 апрелга қадар шифокорга мурожаат қилмаган. 2 кун давомида ўпканинг сунъий вентиляцияси аппаратида бўлди», - дейилади хабарда.
Эслатиб ўтамиз, 2020 йил 17 апрель соат 10:00 ҳолатига кўра, Ўзбекистонда коронавирус инфекцияси қайд этилганлар сони 1380 нафарни ташкил қилмоқда.
