Мирзиёев ва Назарбоев стратегик ҳамкорликларни кенгайтиришни таъкидладилар
Ўзбекистон президенти Шавкат Мирзиёев Қозоғистоннинг биринчи президенти – элбоши Нурсултон Назарбоев билан телефон орқали мулоқотида стратегик ҳамкорликларни янада кенгайтиришни таъкидлади.
Мулоқотда коронавирус инфекцияси тарқалишини олдини олиш, шунингдек, Ўзбекистон ва Қозоғистоннинг жадал ривожланиб бораётган икки томонлама муносабатлари ва иқтисодиётларига пандемия оқибатларининг салбий таъсирини камайтириш борасида икки мамлакат ҳукуматлари томонидан биргаликда кўрилаётган чора-тадбирлар муҳокама қилинди. Бу борадаги саъй-ҳаракатларни мувофиқлаштиришни янада кучайтириш муҳим экани таъкидланди деб хабар қилган Спутник.
Кўп асрлик дўстлик, яхши қўшничилик ва стратегик шериклик тамойилларига асосланган Ўзбекистон-Қозоғистон амалий ҳамкорлиги кенгайиб бораётгани мамнуният билан қайд этилди. Ўзаро манфаатли алоқаларнинг устувор йўналишларида қўшма лойиҳалар амалга оширилмоқда. Ўндан ортиқ янги лойиҳани амалга ошириш назарда тутилаётган саноат кооперациясини мустаҳкамлаш бўйича “йўл харитаси” маъқулланди.
Эслатиб ўтамиз, аввалроқ Шавкат Мирзиёев коронавирусга чалингани маълум бўлган Нурсултон Назарбоевга мактуб йўллаб, ҳол сўраган эди.