Ўзбекистондан Россияга автобус қатнови қайта тикланди

Ўзбекистон Транспорт вазирлиги коронавирус пандемияси туфайли тўхтатилган Россияга автобус қатнови бошланганини маълум қилди.

Ўзбекистон Транспорт вазирлиги хабарига кўра, Ўзбекистон-Россия автобус йўналиши 18-июлдан бошлаб қайта тикланади. Ушбу маршрутнинг манзили - Москва, Қозон ва Санкт-Петербург.

Тошкент вокзалидан душанба ва пайшанба кунлари автобуслар Тошкент-Москва йўналиши бўйича ҳаракатланади. Чипта нархи бир миллион сўм (91 доллар).

Тошкент-Қозон йўналиши бўйича автобуслар сешанба ва жума кунлари қатнайди. Чипта нархи 800 000 сўм (73 доллар).

Тошкент-Санкт-Петербург йўналиши бўйича автобуслар чоршанба ва шанба кунлари қатнайди. Чипта нархи 1 250 000 сўм ($114).

14-июндан бошлаб Россияда коронавирус сабабли киритилган бир қанча чекловлар бекор қилинди.

Тошкент-Самара ва Тошкент-Волгоград йўналишларида темир йўл алоқалари тикланди. Шунингдек, Ўзбекистон фуқароларининг Россияга темир йўл орқали киришига қўйилган чекловлар бекор қилинди.