Шавкат Мирзиёевнинг Будапештга сафарида Ўзбекистон ва Венгрия ўртасида 16 та ҳужжат имзоланди
-
Шавкат Мирзиёевнинг Будапештга сафарида Ўзбекистон ва Венгрия ўртасида 16 та ҳужжат имзоланди
Ўзбекистон ва Венгрия ўртасида имзоланган 16 та ҳужжат икки мамлакат стратегик шериклигини янада ривожлантиришга қаратилган.
Венгрия пойтахти Будапешт шаҳрида ўтган олий даражадаги музокаралардан сўнг икки томонлама ҳужжатларни имзолаш маросими бўлиб ўтди.
Шавкат Мирзиёев ва бош вазир Виктор Орбан Ўзбекистон ва Венгрия ўртасидаги стратегик шерикликни ривожлантириш тўғрисида қўшма баёнот имзолади.
Ўзбекистон ва Венгрия ўртаисдаги ҳужжатда музокаралар дўстона, очиқ ва конструктив руҳда ўтгани қайд этилган, ҳар томонлама ўзаро манфаатли ҳамкорликни фаоллаштириш кўзда тутилган, дипломатик муносабатлар ўрнатилганига 30 йил тўлгани таъкидланган.
Ўзбекистон ва Венгрия ҳукуматлари, вазирлик ва идоралари даражасида Ўзбекистон-Венгрия стратегик шериклик муносабатларини янада кенгайтиришга қаратилган 15 та ҳужжат имзоланди. Булар:
2023-2024 йилларда саноат кооперациясини ривожлантириш бўйича қўшма дастур;
фан ва технологиялар соҳасидаги ҳамкорликни ривожлантириш бўйича ҳаракатлар режаси;
қишлоқ хўжалиги соҳасидаги ҳамкорликни кенгайтириш бўйича ҳаракатлар режаси;
жисмоний тарбия ва спорт соҳасида ҳамкорлик тўғрисида битим;
фанни ривожлантириш соҳасида ҳамкорлик тўғрисида битим.
Божхона, адлия, атроф-муҳитни муҳофаза қилиш, боғдорчилик ва иссиқхона хўжалиги, узумчилик, инвестиция соҳаларида, Ўзбекистон Давлат бошқаруви академияси ва Венгрия Давлат хизмати университети, Самарқанд вилояти ва Хайду-Бихар округи, Халқаро муносабатлар ахборот-таҳлил маркази ва Ташқи ишлар ва савдо институти, Тошкент давлат аграр университети ва Венгрия қишлоқ хўжалиги ва табиий фанлар университети ўртасида ҳамкорлик тўғрисида меморандумлар имзоланди.
Шавкат Мирзиёев Венгрияга икки кунлик расмий ташрифини якунланди ва у кеча қайтиб Тошкенга келди.
