Ўзбекистон ва АҚШ ўртасида энергетика соҳасидаги ҳамкорлик ривожлантирилади
-
Ўзбекистон ва АҚШ ўртасида энергетика соҳасидаги ҳамкорлик ривожлантирилади
Ўзбекистон энергетика вазири Жўрабек Мирзамаҳмудов АҚШ савдо вазирининг ўринбосари Марис Лаго бошчилигидаги делегация аъзолари билан музокаралар ўтказди
Ўзбекистон ва АҚШ мамлакат энергетика соҳасини ислоҳ қилиш, хусусан, энергетика объектларини хусусийлаштириш, қайта тикланувчи энергетикани ривожлантириш режаларини муҳокама қилди. Ўзбекистон томони «яшил» энергетикани ривожлантириш ва углерод нейтраллигига эришиш режаларини тақдим этди. 2030 йилга бориб мамлакат электр энергиясининг камида 25 фоизини қайта тикланувчи энергия манбаларидан, жумладан, 7 ГВт қуёш ва 5 ГВт шамол энергиясидан ишлаб чиқаришни мақсад қилган.
Гидроэнергетикани ривожлантириш учун 142 та потенциал объект ўрганилиб, 54 та лойиҳа белгиланди. Шунингдек, қуввати 500 кВт гача бўлган микро ГЭСлар қуриш бўйича 200 та лойиҳа амалга оширилади. Энергетика вазирлиги АҚШ компанияларининг ОТБ, ХМК, ЕТТБ каби нуфузли халқаро молия институтларининг техник кўмагида ўтказиладиган электр энергиясини ишлаб чиқариш лойиҳалари бўйича тендерларда фаол иштирокини эътироф этди.
Ўзбекистон ва АҚШ расмийлари шунингдек, АҚШ ижобий тажриба тўплаган қайта тикланувчи энергия манбалари соҳасида замонавий технологияларни қўллаш ва иссиқхона газлари чиқиндиларини камайтириш бўйича ҳамкорлик имкониятларини муҳокама қилди.
АҚШ компанияларининг Ўзбекистондаги фаолиятини кенгайтиришга бўлган қизиқиши ортиб бораётгани Air Products лойиҳалари мисолида қайд этилди. Бундан ташқари, GЕ, Schlumberger, Honeywell UOP каби компаниялар билан ҳамкорлик ишлари олиб борилмоқда. Йирик энергетика лойиҳалари учун маслаҳат хизматлари DeGolyer & MacNaughton ва SА консалтинг компаниялари томонидан тақдим этилади.
