Ўзбекистон президенти Вашингтонда АҚШ Конгресси вакиллари билан учрашди

Шавкат Мирзиёев АҚШ пойтахтига ташриф доирасида ўзига ажратилган қароргоҳда Конгресснинг Вакиллар палатаси аъзолари — Билл Хайзенга, Кэрол Миллер ва Сидни Камлагер-Давни билан учрашди.

Кун сайтининг хабар қилишича, учрашувда Ўзбекистон билан АҚШ ўртасидаги стратегик шериклик муносабатларини янада мустаҳкамлаш, икки мамлакат парламентларининг амалий ҳамкорлигини кенгайтириш масалалари кўриб чиқилди. Қонун чиқарувчи органлар ўртасидаги алоқалар жадал ривожланаётгани, Конгрессда Ўзбекистон бўйича кокус самарали фаолият юритаётгани таъкидланди.

Томонлар ҳар йили Вакиллар палатасида кокус кўмагида ўтказилаётган “Ўзбекистон кунлари” икки томонлама муносабатларни мустаҳкамлашга хизмат қилаётганини қайд этди. Шу билан бирга, олий даражада эришилган келишувларни, аввало савдо-иқтисодий, инвестициявий ва маданий-гуманитар соҳаларда амалга оширишга Конгресс қўллаб-қувватлови муҳим экани таъкидланди.

Учрашувда ҳудудлараро ҳамкорликни кенгайтиришга алоҳида эътибор қаратилди. Конгресс аъзолари вакиллик қилаётган Ғарбий Виржиния, Мичиган ва Калифорния штатлари билан саноат, инфратузилма, қишлоқ хўжалиги, таълим ва бошқа йўналишларда амалий шериклик лойиҳаларини ишга тушириш масалалари муҳокама этилди.

Якунда АҚШ Конгресси вакилларининг Ўзбекистонга ташрифини уюштириш, шунингдек, икки мамлакат ҳудудлари раҳбарлари бошчилигидаги ишбилармон доиралар делегацияларининг ўзаро ташрифларини ташкил этиш бўйича келишувга эришилди.