Америкалик генерал: Эрон базаларимизни вайрон қилишига умуман кутмаган эдик
АҚШ Қуролли Кучлари Бирлашган штаблари собиқ раиси Трампнинг Эронга қарши урушда авианосецларни узоқ муддатга жойлаштириш ҳақидаги қарорини танқид қилиб, Америка Қўшма Штатлари минтақадаги ҳарбий базалари Эрон томонидан вайрон қилиниши ва йўқ қилинишига тайёр бўлмаганини тан олди.
PARS TODAY хабарига кўра, АҚШ Қуролли Кучлари Бирлашган штаблари собиқ раиси Майк Маллен якшанба куни кечқурун ABC News телеканалидаги «This Week» дастурида иштирок этиб, шундай деди: «Авианосецларни узоқ муддатга жойлаштириш одатий ҳол, аммо АҚШ президенти Дональд Трампнинг бундай жойлаштириш етарлича узоқ давом этмагани ҳақидаги баёнотига жавобан айтишим керакки, бу қадар узоқ муддатли жойлаштиришлар экипажларга салбий таъсир кўрсатади».
У АҚШ ва Исроил режими тажовузларига қарши Эрон Ислом Республикасининг ҳарбий салоҳияти ва мудофаа операцияларига ишора қилиб, шундай деди: «Менимча, биз минтақада аввалроқ қўшинларимиз жойлашган АҚШ ҳарбий базалари вайрон қилиниши ва йўқ қилинишини аниқ кутиб турмаган эдик».
Ғарбий Осиёда Эронга қарши ноқонуний урушни қўллаб-қувватлаш мақсадида узоқ муддатли миссия билан жойлаштирилган «Абрахам Линкольн» авианосецининг таъминот ҳолати оғир экани ҳақида хабарлар тарқалганидан, шунингдек, унинг ходимлари ўртасида ўз жонига қасд қилиш ҳолатлари ҳақида шов-шувли маълумотлар пайдо бўлганидан сўнг, АҚШ Вакиллар палатасининг бир қатор аъзолари бу масала юзасидан изоҳ талаб қилди.
«Абрахам Линкольн» авианосеци таркибида қарийб 5 минг нафар денгизчи ва денгиз пиёда аскари бор. Унинг миссияси 21 ноябрда бошланган бўлиб, АҚШнинг Эронга қарши ноқонуний ва тажовузкор уруши қўллаб-қувватланиши доирасида узайтирилган.
