Истанбул теракти сабаб Туркияда мотам эълон қилинди

Истанбулда содир этилган иккита теракт сабаб бутун Туркия бўйича миллий мотам эълон қилинди. Milliyet газетаси берган маълумотга кўра, бу ҳақидаги фармон мамлакат бош вазири Бинали Йилдирим томонидан имзоланган.

Кун. ўз сайтига кўра, Фармонга мувофиқ, барча давлат ташкилотларидаги мамлакат байроғи туширилади.

Эслатиб ўтамиз, Истанбулда Тошкент вақти билан 00.30да Мачка парки ва “Водафон Арена” стадиони олдида юз берган. Маълумотларга кўра, у худкуш ва миналаштирилган машина ёрдамида амалга оширилган.

Туркия бош вазири ўринбосари Нўъмон Куртулмушнинг маълум қилишича, Истанбулдаги портлашлар Курдистон ишчилар партияси аъзолари томонидан содир этилган.

«Бу терактлар ортида КИП турибди», —дея бош вазир ўринбосарининг сўзларини келтирган Hurriyet.

Куртулмуш ушбу портлашда роса 400 кг миқдоридаги портловчи моддадан фойдаланилганини айтиб ўтган.

Истанбулнинг Бешиктош туманида жойлашган Vodafone Arena ўйингоҳи яқинида 10 декабрь оқшомида содир этилган терактлар туфайли 38 киши ҳалок бўлди ва 160 киши жароҳатланди.

Бундан олдинроқ Туркия ИИВ ушбу терактга алоқадорликда гумон қилиниб, 13 киши қўлга олингани ҳақида хабар берганди.

Туркия президенти Ражаб Тойииб Эрдўғаннинг маълум қилишича, Истанбулдаги терактлардан мақсад янада кўпроқ кишиларни ўлдириш бўлган.