Қизалоқ 8 кишининг ҳаётини сақлаб қолди
-
Жарроҳлик хонаси
Британияда бир қизнинг донорлик аъзолари туфайли 8 кишининг ҳаётини сақлаб қолишга муваффақ бўлинди. The Guardian нашрининг ёзишича, донор бош мия аневризмидан вафот этган 13 ёшли британиялик Жемима Лейзел бўлган.
Қизчанинг ота-онаси унинг вафотидан кейин органларини бошқа муҳтож кишиларга беришга қарор қилишган. Қизнинг тана аъзолари кўчириб ўтказилган 8 кишидан 5 нафари болалардир. 3 киши Жемиманинг юрагини, ингичка ичаги ва ошқозоности безини, 2 киши унинг буйракларини, яна бир киши ўпкасини олган. Қизнинг жигари эса икки киши орасида тақсимланган.
Жемиманинг ота-онаси бундай қарорга келиш қийин бўлганини, бироқ улар шунчалик кўп миқдордаги одамларнинг ҳаётини сақлаб қолишгани учун хурсанд эканликларини айтишган.
Азизлар, бошқа инсонларнинг ҳаётини сақлаб қолиш учун вафот этган жигарбандларининг органларини ҳадя қилиш бугун бутун дунёда хайрли инсонпарварлик амалига айланган. Афсуски, Марказий Осиё мамлакатларида бу эзгу ишга жиддий эътибор қаратишмайди.
Бу ҳақда Сиз қандай фикрдасиз?
