Шошилинч: Москва АҚШга ҳарбий жавоб қайтариш билан таҳдид қилди

АҚШ президенти Дональд Трамп Қўшма Штатлар ўрта ва қисқа масофаларга учувчи ракеталар бўйича шартномадан чиқишини маълум қилди.

Америкаликлар раҳбари «Россия бу келишувни кўп вақтдан буён бузиб келаётгани»га жавобан шундай қадам ташлаганини билдирган.

«Биз мазкур келишувни бекор қилмоқчимиз, кейин Россия ва Хитой янги келишувга рози бўлмагунга қадар қуролланишни ривожлантиришда давом этамиз», деган у.

Россия Ташқи ишлар вазирлиги бу баёнотга таҳдидона жавоб қайтарди.

ТИВ раҳбари ўринбосари Сергей Рябковнинг қайд этишича, америкаликлар халқаро келишувлардан ўта қўполлик билан чиқмоқда. Мисол тариқасида Эрон бўйича ядровий келишувидан Халқаро почта иттифоқигача келишувлар келтирилган.

«Америкаликларда Россияни бу келишувни бузгани ҳақида айблаш учун асос йўқ», деган дипломат.

«Бу ҳолда биз жавоб чоралари қўллашга мажбур бўламиз. Хусусан, ҳарбий-техник характердаги чоралар. Аммо иш бунгача етиб боришини истамаймиз», —  дея қўшимча қилган у.

ТИВ раҳбари ўринбосари 22 октябрь куни АҚШ президентининг миллий хавфсизлик бўйича маслаҳатчиси Жон Болтон Москвага келиб, Россия президенти Владимир Путин, Ташқи ишлар вазири Сергей Лавров ҳамда Хавфсизлик кенгаши бош котиби Николай Патрушев билан учрашишини маълум қилган.

Ўрта ва қисқа масофаларга учувчи ракеталар бўйича шартнома 1987 йилда собиқ иттифоқ президенти Михаил Горбачев ва АҚШ президенти Рональд Рейган ўртасида тузилган. Бу келишув томонларга 500 километрдан 5,5 минг километр масофага ҳаракатланувчи баллистик ва қанотли ракеталарга эга бўлишга рухсат бермайди. Москва ва Вашингтон доимий равишда бир-бирини бу келишувни бузишда айблаб келади.