Путин Украинани кескин ҳаракатлари туфайли огоҳлантирди

Россия президенти Украина томонидан чуқур ўйламай кўрилаётган ҳар қандай кескин чоралар ҳақида огоҳлантирди ва Германия канцлеридан ушбу мавзу юзасидан босим ўтказиш кераклигини сўради.

Франция ахборот агентлигининг Кремл баёнотига таяниб хабар қилишича, Россия президенти Владимир Путин душанба куни Германия концлери Анела Меркел билан ўтказган телефон мулоқотида Москванинг Украинада ҳарбий ҳолат эълон қилинишидан жиддий хавотирда эканлигини билдирди. 

Россия «Азов денгизида вазиятнинг хавфли ривожланиши ва ундан кейин содир бўлган воқеалар муносабати билан» Хавфсизлик кенгашининг фавқулодда йиғилишини чақиртирди. Йиғилишни «Халқаро тинчлик ва хавфсизликни таъминлаш» мавзусидаги кун тартиби банди бўйича ўтказиш сўралган.

25 ноябрь куни ФХХ Украинанинг учта ҳарбий кемаси Россия ҳудудий сувларига киргани ҳақида хабар қилди. Кемалар Одессадан Мариуполга йўл олаётган бўлган, лекин уларни Керч бўғозидан ўтказишмади. Украина томонининг билдиришича, аввал Россия кемалар келиши ҳақида хабардор этилган, ФХХ бунинг аксини иддао қилмоқда.

Шу куниёқ Украина ҳарбий-денгиз кучлари Россия катерлари мамлакат кемалари гуруҳи Керч бўғозидан чиқиб кетаётганида унга қарата ўт очганини маълум қилди. Россия чегарачиларининг бундай хатти-ҳаракати туфайли олти нафар денгизчи яраланди.