Буюк Британия Путинга яқин бизнесменларга қарши санкция эълон қилади. Улар орасида Алишер Усмонов ҳам бор
-
Буюк Британия Путинга яқин бизнесменларга қарши санкция эълон қилади. Улар орасида Алишер Усмонов ҳам бор
Буюк Британия бош вазири Тереза Мей мамлакатда ҳуқуқлари чегараланиши режалаштирилаётган олти нафар россиялик бизнесменларнинг рўйхатини тасдиқлади. Бу ҳақда «Meduza» хабар берди.
Бу USM Holdings компаниялар гуруҳи асосчиси Алишер Усмонов, «Челси» футбол клуби эгаси Роман Абрамович, «Русала» собиқ президенти Олег Дерипаска, ака-ука Аркадий ва Борис Ротенберглар ҳамда «Роснефть» раҳбари Игорь Сечин. Уларнинг айримлари аллақачон АҚШ ва Европа Иттифоқи санкциялари остида.
Британия ҳукумати улардан визаларини қайтариб олмоқчи, мамлакатда рўйхатдан ўтган активларининг келиб чиқиши ва кўчмас мулклари қонунийлигини текширмоқчи. Ҳукумат шунингдек АҚШ ва Европа иттифоқи мамлакатларидаги иттифоқдошларидан улар томондан ҳам ҳудди шундай чоралар кўрилиши тўғрисида мурожаат қилмоқчи.
«Ушбу кўрилаётган чоралардан асосий мақсад — уларнинг Буюк Британия, Европа ва бошқа ерларда эркин ҳаракатланишини чегаралашдан иборат», — дейди мамлакат хавфсизлик хизмати вакили.
Британия ҳукуматининг режаси, Солсберида Россияда жосуслик учун жазога ҳукм этилган Сергей Скрипал, унинг қизи Юлиянинг заҳарланиши, шунингдек Лондоннинг даъво қилишича, суиқасд қилишда қўлланилган «Новичок» асаб-фалаж тизимига таъсир қилувчи моддадан мамлакат фуқароларининг бир қанчаси жабрланганига жавоб тарзида амалга оширилмоқда.
Бизнесменларнинг вакиллари ва уларга яқин манбалар уларнинг сиёсатга алоқадорлигини инкор этмоқда. Масалан, Алишер Усмоновнинг вакили унинг сиёсатчиларни фаол қўллаб-қувватламаслигини, «Челси» футбол клубида эса Роман Абрамовичнинг Владимир Путинга яқин алоқаси йўқлигини маълум қилди.
