Россиядаги авиаҳалокат 41 кишининг умрига зомин бўлди (видео)

“Аэрофлот” компаниясининг Sukhoi Superjet 100 йўловчи самолёти билан Шереметьево аэропортида юз берган ҳалокат оқибатида 41 киши ҳаётдан кўз юмди.

Хабарларга кўра, ушбу авиаҳалокатда 41 киши ҳалок бўлган. 

Маълум қилинишича, самолёт бортида бўлган 78 кишидан 37 киши, жумладан 33 йўловчи ва экипажнинг 4 аъзоси омон қолган. 6 киши шифохонага етказилган, улардан 3 нафари оғир аҳволда.  

Москвадан Мурманскка йўналаётган самолёт 5 май куни парвозни бошлагандан 28 дақиқа ўтиб Шереметьево аэропортига фавқулодда қайтиб, кескин қўнишни амалга оширган. Самолёт мураккаб об-ҳаво шароити туфайли иккинчи уринишдан кейингина қўна олган. Самолёт қўнганда унинг стойкалари синиб, двигателлари ёна бошлаган. 

Ушбу фожиа юзасидан жиноий иш қўзғатилган ҳамда уни тергов қилиш бўйича давлат комиссияси тузилган.