Москвадан келган ўзбекистонликлар: карантинда шароит йўқ
Москва шаҳридан Тошкентга етиб келган 500 га яқин ўзбекистонликлар Бўстонлиқ тумани «Қизилсув» маҳалласи «Сокол» спорт-соғломлаштириш марказига карантинга олинди
Дарё сайтига кўра, 14 кунга карантинга олинган фуқаролар у ерда шароитлар йўқлигидан шикоят қилмоқда.
Карантинга олинган эркаклардан бирининг айтишича, рейс 17—18 март кунлари Uzbekistan Airways ва «Аэрофлот» авиакомпаниялари томонидан амалга оширилган. У бошқа фуқаролар билан бирга 18 март, чоршанба куни, Қизилсув дараси жойлашган спорт-соғломлаштириш марказига келган. «Биздан аввал яна бир рейс учиб келганди. Уларни биздан олдин жойлаштириб бўлишди. Яъни бу ерда иккита рейснинг йўловчилари — тахминан 500 киши бор», — дейди у.
Аввалроқ Uzbekistan Airways чет эллик фуқароларни Москвага ва ўзбекистонлик фуқароларни Москвадан Тошкентга олиб келиш учун 17 март, сешанба куни, Тошкент—Москва—Тошкент чартер рейсни амалга ошириши маълум этилганди.
Ушбу рейс 18 март куни ўзбекистонликларни Тошкентга олиб келган «Аэрофлот» томонидан соат 3:17 да амалга оширилган. Ортга қайтишда авиакомпания Москвага 282 нафар россияликни олиб кетишни режалаштирган.
Фуқаролардан бирининг айтишича соғломлаштириш маркази кўп миқдордаги одамларни қабул қилишга тайёр эмасди.
«Хоналар 5 кишига мўлжалланган, 16 та хона бўлган бир қаватда аёллар ва эркаклар учун биттагина ҳожатхона ва ҳаммом бор эди. Овқатланиш хонаси ҳам умумий. Хонада иситиш тизими йўқ, ишламайдиган кичкинагина иситгич қурилмаси турибди. Бу ерда касал бўлишимизни ҳамма билиб турибди. Бу ерда ҳамма бир бири билан алоқада бўляпти. Бу эса аксинча, коронавирус юқиши учун шароит яратади. Объект яқинда топширилгани кўриниб турибди, электр симлар тармоғи ўрнатилмаган, шунчаки ташқарида турибди, холос. Иссиқ сув бор, лекин баъзан ўчиб қолади», — дея сўзларини давом эттиради карантиндаги эркак.
