Эрдўғоннинг Украинанинг Лвов шаҳрида Гутерреш ва Зеленский билан суҳбати
-
Эрдўғоннинг Украинанинг Лвов шаҳрида Гутерреш ва Зеленский билан суҳбати
Пайшанба куни Туркия президенти Ражаб Тоййиб Эрдўғон Украинанинг Лвов шаҳрида ушбу мамлакат президенти Владимир Зеленский ва Бирлашган Миллатлар Ташкилоти Бош котиби Антониу Гутерриш билан учрашиб, суҳбатлашди.
Эрон телерадиокомпаниясининг ўзбек тилидаги сайтининг хабар қилишича, Эрдўғон пайшанба куни Зеленскийнинг таклифига биноан Украинанинг Лвов шаҳрига БМТ Бош котиби Антониу Гутерриш иштирокидаги уч томонлама учрашувда иштирок этиш учун борган. Украинанинг Одесса портидан ғалланинг хавфсиз экспорти, Запорижжия атом электр стансиясининг хавфсиз ишлаши, Украинадаги урушни тугатишга ёрдам бериш учун дипломатик ҳаракатлар каби мавзулар бу уч томонлама учрашувнинг асосий мавзуларидан бўлди.
Ушбу уч томонлама учрашувдан сўнг Эрдўғон Зеленский ва Гутерреш билан ўтказган муштарак матбуот анжуманида ушбу учрашув натижаларини Россия Президенти Владимир Путин билан баҳам кўришини айтди.
Туркия президенти, шунингдек, Гутерреш ва Зеленский билан Украина ва Россия ўртасидаги ҳарбий асирларни алмашиш бўйича суҳбатлашганини маълум қилди.
Украина президенти Владимир Зеленский ҳам шундай деди: Россия билан музокаралар фақат бу давлат "босиб олган ҳудудларни" тарк этсагина мумкин.
Бирлашган Миллатлар Ташкилоти Бош котиби Украина ва Туркия президентлари билан бўлиб ўтган қўшма матбуот анжуманида Украинадан ғалла экспорти бўйича келишувга ишора қилиб, жаҳон озиқ-овқат бозори барқарорлашаётгани кўрсаткичлари борлигини айтди.
