Нордстрим портлаши; CIAнинг диверсия режасидан хабардорлиги фош этилди

Нордстрим портлаши яна диққат марказига тушди; «Шпигел» журнали АҚШ Марказий разведка бошқармаси (CIA) амалиётдан олдин ушбу қувурга қарши диверсия режасидан хабардор бўлганини фош қилди

Германиянинг «Шпигел» журнали Киевдаги манбаларга таяниб хабар беришича, АҚШ Марказий разведка бошқармаси (CIA) 2022 йил баҳорида Балтика денгизидаги Нордстрим газ қувурларини портлатиш режаси юзасидан украиналик омиллар билан музокара ўтказган ва ушбу фитнанинг тафсилотларидан хабардор бўлган. Нордстрим портлаши 2022 йил сентябрида содир бўлиб, Россия газини Германияга етказиб беришнинг энг муҳим йўналишларидан бирини ишдан чиқарган эди.

Pars Today хабарига кўра, Берлин бир нечта украиналик ғаввос кичик сайёҳлик қайиғини ижарага олиб, эҳтимол Польша ёрдами билан Балтика денгизи тубига тушиб, портловчи моддаларни ўрнатиш орқали қувурларни вайрон қилган, деб ҳисоблайди. Украиналик манбалар «Шпигел»га айтишича, америкаликлар дастлабки учрашувларда «кўринишидан ушбу режадан мамнун бўлишган» ва ҳатто «Қатар» код номи билан аталган амалиётнинг техник тафсилотлари икки томон ўртасида алмашилган.

Бироқ нашр даъвосига кўра, 2022 йил ёзи бошида Вашингтон ўз позициясини ўзгартириб, амалиётни молиявий қўллаб-қувватламаслигини маълум қилган. «Шпигел» яна шунни таъкидлайдики, АҚШ кейинчалик диверсияни тўхтатишга уринган, аммо украиналик омиллар ўз режасини амалга оширган.

Ушбу ривоятларга жавобан, Москва аввалроқ АҚШнинг ўша пайтдаги президенти «Жо Байден»нинг 2022 йил февралда айтган «энди Нордстрим бўлмайди. Биз уни тугатамиз» деган баёнотига ишора қилиб, Ғарбнинг расмий ривоятини шубҳа остига олган эди. Россия, шунингдек, бундай амалиёт АҚШ ҳукуматининг тўғридан-тўғри қўллаб-қувватловисиз амалга оширилиши мумкин эмаслигини таъкидлаган.

Нордстрим портлашидан бир йил ўтиб, америкалик таҳқиқотчи журналист «Сеймур Ҳерш» ўз ҳисоботида ушбу қувурларни вайрон қилиш буйруғи Оқ уй томонидан берилганини даъво қилди; АҚШ ҳукумати эса бу иддаони «бутунлай хаёлий» деб атаган. Агар ЦИАнинг Нордстрим портлашидаги роли тасдиқланса, бу Европадаги геосиёсий рақобат ва энергетик хавфсизлик муаммоларининг янги қирраларини очиб бериши мумкин.