İran MAQATE ilə əməkdaşlığı davam etdirir

İranın MAQATE-dəki nümayəndəsi Rza Nəcəfi bildirib ki, İranın bütün nüvə obyektlərinə çıxış hücumdan əvvəl mövcud olub və hazırkı vəziyyət İrana qarşı həyata keçirilən hücum və təcavüzün nəticəsidir. O, İranın MAQATE ilə əməkdaşlığı davam etdirdiyini və agentlik müfəttişlərinin Buşəhr Atom Elektrik Stansiyasına səfərinin planlaşdırıldığını açıqlayıb.

İranın Beynəlxalq Atom Enerjisi Agentliyində (MAQATE) nümayəndəsi Rza Nəcəfi CGTN telekanalına eksklüziv müsahibəsində bildirib ki, hücumdan əvvəl İranın bütün nüvə obyektlərinə çıxış mövcud olub. Onun sözlərinə görə, məhz İrana qarşı həyata keçirilən hücum və təcavüz hazırkı vəziyyətin yaranmasına səbəb olub və buna görə İran günahlandırılmamalıdır.

Nəcəfi qeyd edib ki, İran MAQATE ilə əməkdaşlığı davam etdirir. Hazırda agentlik müfəttişlərinin İrana səfər edərək Buşəhr Atom Elektrik Stansiyasına baxış keçirməsi və burada yoxlama aparması planlaşdırılır.

O vurğulayıb ki, hücuma məruz qalan obyektlərlə bağlı vəziyyətin normallaşması üçün regionda bütün düşmənçiliklərə son qoyulmalıdır.

İranlı diplomat bildirib ki, keçmişdə də qətnamələrin qəbulundan sonra təcavüz və hərbi əməliyyatların baş verdiyi hallar olub və bunun ABŞ və müttəfiqlərinin davranışına çevrildiyini deyib.

Nəcəfi əlavə edib ki, İran milli maraqlarını bütün vasitələrlə qorumaqda davam edəcək və İran xalqı xarici təzyiqlər qarşısında heç vaxt təslim olmayacaq.

“İranın mesajı aydındır: biz sona qədər müdafiə edəcəyik və neftimizin talan edilməsinə imkan verməyəcəyik”, – deyə Nəcəfi vurğulayıb.