İqtisadi dayanıqlılıq təhlükəsizlik olmadan davamlı olmayacaq

İran Prezidenti vurğulayıb ki, BRİKS bu gün sadəcə bir neçə inkişaf etməkdə olan iqtisadiyyat arasında əməkdaşlıq çərçivəsi deyil. O, qeyd edib: BRİKS heç bir güc mərkəzinin digər xalqların taleyini müəyyən etmək hüququna malik olmadığı daha balanslı və inklüziv dünya tələbinin getdikcə artdığının göstəricisidir.

ParsToday-in məlumatına görə, İran Prezidenti Məsud Pezeşkian BRİKS-Plus sammitinin “Dayanıqlılıq, əməkdaşlıq və davamlılıq: inklüziv qlobal inkişaf üçün gələcəyin formalaşdırılması” mövzusuna həsr olunmuş 18-ci iclasında bildirib: Heç bir ölkə dünyanın bugünkü problemlərini təkbaşına həll etmək iqtidarında deyil. BRİKS Qlobal Cənub ölkələrinin səpələnmiş imkanlarını ümumi potensiala çevirməlidir. Bu baxımdan, İran İslam Respublikasının geosiyasi mövqeyi, enerji və tranzit imkanları üzv ölkələr arasında ticarət və enerji dəhlizlərinin inkişafında mühüm rol oynaya bilər.

O bildirib ki, iqtisadi dayanıqlılıq təhlükəsizlik olmadan davamlı ola bilməz və vurğulayıb: Regionumuzda baş verən hadisələr, xüsusilə ABŞ və İsrail rejiminin İran İslam Respublikasına qarşı hərbi təcavüzü göstərdi ki, bir ölkənin iqtisadi, enerji və inkişaf infrastrukturlarının hədəfə alınmasının nəticələri qısa müddətdə ölkə sərhədlərini aşaraq regional və qlobal fəsadlara səbəb ola bilər.

Pezeşkian əlavə edib: İran xalqı bu təcavüzlərə görə ağır bədəl ödəyib. Qadınlar və kişilər, uşaqlar və mülki şəxslər həyatlarını itirib, ölkənin inkişafı üçün onilliklər ərzində yaradılmış infrastruktura ziyan dəyib. Bu hadisələr beynəlxalq ictimaiyyətin mülki şəxslərin müdafiəsi və mülki obyektlərə hücumların normallaşdırılmasının qarşısının alınması qarşısında daşıdığı ağır məsuliyyəti xatırladır.

O, çıxışının davamında bildirib: Qəzza və Livan xalqları da hələ də cinayətlərin və soyqırımın nəticələri ilə üz-üzədir. Hərbi təcavüzə, insanların qətlə yetirilməsinə və onların həyatlarının məhv edilməsinə qarşı effektiv beynəlxalq cavab verilmədiyi halda beynəlxalq hüquqdan danışmaq mümkün deyil. Buna görə də BRİKS milli suverenliyin, ərazi bütövlüyünün və güc tətbiqindən istifadənin qadağan edilməsinin müdafiəsində daha təsirli rol oynamalıdır.

Pezeşkian əlavə edib: BRİKS bu gün sadəcə bir neçə inkişaf etməkdə olan iqtisadiyyat arasında əməkdaşlıq çərçivəsi deyil, heç bir güc mərkəzinin digər xalqların taleyini müəyyən etmək hüququna malik olmadığı daha balanslı və inklüziv dünya tələbinin getdikcə artdığının göstəricisidir.

O, sonda bildirib: İran İslam Respublikası bu istiqamətdə öz imkanlarını BRİKS əməkdaşlığının ixtiyarına verməyə hazırdır. Dayanıqlılıq davamlı əməkdaşlıq olmadan qorunub saxlanıla bilməz, əməkdaşlıq ədalət olmadan davamlı deyil, davamlılıq isə sülh və təhlükəsizlik olmadan mümkün deyil. Gəlin, BRİKS-i bu prinsiplərin praktiki fəaliyyətə çevrilməsi üçün platformaya çevirək. İnkişaf, təhlükəsizlik və tərəqqinin hamı üçün mümkün olduğu gələcək nəinki mümkündür, həm də gələcək nəsillər qarşısında ortaq məsuliyyətimizdir.