Ղարաբաղի հարցում որևէ ռազմական լուծում հաջողություն չի ունենա. Ապատուրայ
Հարավային Կովկասում ՆԱՏՕ–ի հատուկ ներկայացուցիչը կտրականապես դեմ է ղարաբաղյան հակամարտության ռազմական լուծմանը։
ՆԱՏՕ–ն չի միջամտում ղարաբաղյան հակամարտության կարգավորմանը։ Երևանում հրավիրված մամուլի ասուլիսի ժամանակ այս մասին ասաց Հարավային Կովկասում ՆԱՏՕ–ի հատուկ ներկայացուցիչ Ջեյմս Ապատուրայը` մեկնաբանելով Ադրբեջանի զանգվածային զորավարժությունները։
Միևնույն ժամանակ նա ընդգծեց, որ ղարաբաղյան հակամարտությունը կարող է լուծվել բացառապես խաղաղ ճանապարհով։
«ՆԱՏՕ–ի գնահատականը սա է. հակամարտությունը կարող է կարգավորվել միայն քաղաքական ճանապարհով։ Կարծում ենք, որ ռազմական որևէ լուծում հաջողություն չի ունենա։ Սա այն ուղերձն է, որը մենք փոխանցում ենք հակամարտության կողմերին», – ավելացրեց Ապատուրայը։
ՆԱՏՕ–ի ներկայացուցիչը նաև նշեց, որ իրենց բավականին ոգևորել են ՀՀ նոր կառավարության` հակամարտության քաղաքական կարգավորման ջանքերը։
«Մեզ նաև ուրախացնում է շփման գծում էսկալացիայի և գնդակոծությունների քանակի նկատելի նվազումը», – ընդգծեց նա։
Հիշեցնենք, որ Ադրբեջանը երկուշաբթի խոշոր զորավարժություններ է սկսել, որոնցում ներգրավված են շուրջ 10 հազար զինծառայող և մեծ քանակության ռազմատեխնիկա։
armeniasputnik.am
