Ալիև. Բաքուն փոխզիջման չի գնա տարածքային ամբողջականության հարցում
Ադրբեջանի նախագահ Իլհամ Ալիևը, հոկտեմբերի 8-ին ելույթ ունենալով տեղահանվածների առջև, հայտարարել է, որ ԼՂ հիմնախնդրում Բաքուն Հայաստանի հետ փոխզիջման չի գնա տարածքային ամբողջականության հարցում:
«Տարածքային ամբողջականության հարցում փոխզիջումներ լինել չեն կարող: Դա բանակցությունների առարկա չէ և չի կարող լինել»,-ասել է Ալիևը, հայտնում է Interfax.az-ը:
Ալիևը հայտարարել է նաև, որ Ադրբեջանի տարածքային ամբողջականությունը պետք է վերականգնվի: «Ամբողջ աշխարհն է ճանաչում մեր տարածքային ամբողջականությունը և մենք այդ ուղղությամբ հետևողական քաղաքականություն ենք վարում»,-ասել է նա:
Ավելի վաղ Ադրբեջանի նախագահ Իլհամ Ալիևը Սոչիում տեղի ունեցած Վալդայի համաժողովում անդրադարձել է ՀՀ վարչապետ Նիկոլ Փաշինյանի այն հայտարարությանը, որ Ղարաբաղը Հայաստան է և վերջ՝ հայտարարելով. «Ղարաբաղն Ադրբեջան է և բացականչական նշան»:
Panarmenian.net
