Հայաստանի առնվազն երեք մարզի գյուղացիները բոյկոտում են հանրաքվեն. Ֆերմեր

Վայոց ձորի, Սյունիքի եւ Գեղարքունիքի մարզերի գյուղացիները բոյկոտում են հանրաքվեն: Մարտի 4-ին լրագրողների հետ հանդիպմանը վստահություն հայտնեց ֆերմեր Տիգրան Եղոյանը:

Ըստ նրա` 1-2 տարվա ընթացքում գյուղացիների շրջանում վարկառուների թիվն աճել է 20 տոկոսով, եւ իշխանությունների բոլոր գործողությունները հանգեցնում են նրան, որ ֆերմերները նորից կորցնում են հույսը: «Զրամատակարարման խնդիրները ՀԷԿ-ի գործունեության պատճառով չեն լուծվել, անասնաբույժները շարունակում են 50-60 հազար ստանալ, մինչդեռ նախարարներն արդեն 1.5 միլիոն դրամ են ստանում, եւ կառավարությունում ոչ ոք չի խոսում այս խնդիրների մասին: Նիկոլ Փաշինյանը շարունակում է ավերել գյուղերը, վիրավորել գյուղացիներին եւ համայնքների միավորման ծրագրեր իրականացնել՝ զուտ քաղաքական նպատակներ հետապնդելով: Հաշվի առնելով այն փաստը, որ գյուղացիները մնացել են առանց պետական ​​աջակցության, ես նրանց կոչ եմ անում բոյկոտել հանրաքվեն, որը գյուղերում լրացուցիչ լարվածության առիթ է դարձել»,- նշեց նա:

ՀՀ խորհրդարանի նախկին պատգամավոր Լեռնիկ Ալեքսանյանն, իր հերթին, նշեց, որ գյուղատնտեսության ոլորտում առկա խնդիրների կեսից ավելին ավելի շատ կապված է աշխատանքի կազմակերպման հետ, ինչպես պետության, այնպես էլ գյուղացիների կողմից, եւ այս իրավիճակը շարունակվում է արդեն 30 տարի: «Խնդիրները պետք է լուծվեն համակարգված, եւ ոչ միայն պարարտանյութեր կամ վառելիք բաժանելով, իսկ մենք դեռ չգիտենք, թե ինչպիսին պետք է լինի մեր գյուղատնտեսության կառուցվածքը: Չնայած բազմաթիվ ծրագրերին, այդ թվում նաեւ` դրամաշնորհային, երկրում ջրի կորուստները 80 տոկոս են կազմում: Ես անընդունելի եմ համարում իշխանությունների` գյուղատնտեսական կարիքների համար ջրի սեզոնային մատակարարման մասին որոշումը` հաշվի առնելով, որ ոռոգումը պետք է իրականացվի, օրինակ, ծիրանի ծաղկման շրջանում»,- եզրափակեց նա:

Հիշեցնենք, որ Սահմանադրության մեկ հոդվածում փոփոխություններ կատարելու մասին հանրաքվեն նախատեսված է ապրիլի 5-ին: Իշխանություններն առաջարկել են վաղաժամկետ դադարեցնել Սահմանադրական դատարանի 7 և 9 անդամների լիազորությունները, ներառյալ` դրա նախագահի` նրանց նախկին «ռեժիմի» ներկայացուցիչներ անվանելով: Գրեթե բոլոր քաղաքական ուժերը, բացառությամբ իշխող «Իմ քայլը» դաշինքի եւ նախկին նախագահ Լեւոն Տեր-Պետրոսյանի Հայ ազգային կոնգրեսի, հրաժարվել են մասնակցել այդ գործընթացին` այն, մեղմ ասած, իրավականորեն խոցելի անվանելով: Պատասխանը դրական կհամարվի ոչ միայն այն դեպքում, եթե «ԱՅՈ» ասի ընտրողների կեսից ավելին, այլ նաեւ` ընտրողների ցուցակի առնվազն մեկ քառորդի դեպքում, այսինքն` մոտ 650 հազար մարդու:

News.am