ՀՀ զինված ուժերի համար տարածքներ նվաճելու խնդիր չենք դնելու. Նիկոլ Փաշինյան
Հայաստանը պետք է ունենա ժամանակակից չափանիշներին համապատասխան մարտունակ բանակ:
«Արմենպրես»-ի փոխանցմամբ, այս մասին ԶԼՄ-ների և հասարակական կազմակերպությունների ներկայացուցիչների համար կազմակերպված առցանց ասուլիսի շրջանակում ասաց Հայաստանի վարչապետ Նիկոլ Փաշինյանն՝ ընդգծելով, որ այն ոչ թե լինելու ագրեսիվ քաղաքականության, այլ Հայաստանի, տարածաշրջանի համար խաղաղ դարաշրջան բացելու օրակարգի արտահայտիչ:
«Հայաստանն արձանագրում է, որ ՀՀ զինված ուժերի համար տարածքներ նվաճելու խնդիր չենք դնելու, այլ խնդիր է դրվելու պաշտպանել Հայաստանի Հանրապետության տարածքային ամբողջականությունը, ինքնիշխանությունը: Արձանագրեմ նաև, որ մեր անվտանգության ապահովման ամբողջ բեռը չպետք է դնենք բանակի վրա: Շատ կարևոր է, որ խաղաղության օրակարգով, արտաքին քաղաքականությամբ կարողանանք թեթևացնել, այլ ոչ թե ծանրացնել Հայաստանի բանակի և ՀՀ զինված ուժերի դերը»,-ասաց Նիկոլ Փաշինյանը:
ՀՀ վարչապետը նշեց, որ կառավարությունը ծրագրում հստակ արձանագրել է, թե ինչ նպատակ ու խնդիր է դրել ու դնելու բարեփոխվող բանակի առաջ: Հայաստանը պետք է ունենա պրոֆեսիոնալ բանակ: Նիկոլ Փաշինյանն ընդգծեց, որ ամենօրյա ռեժիմով աշխատանքի շնորհիվ պետք է հասնել դրան:
armenpress.am
