Իրանցի դիվանագետ. ՀԱՊԿ-ից Հայաստանի դուրս գալը դավաճանություն կլինի հայերի նկատմամբ
Իրանի նախկին դեսպան, միջազգային հարցերով փորձագետ Աբոլֆազլ Զոհրեվանդն ասում է. «Եթե Հայաստանը դուրս գա ՀԱՊԿ-ից, դա դավաճանություն կլինի հայերի նկատմամբ, քանի որ նկատի ունենալով անցյալի և ապագայի սպառնալիքները, նրանք հույսը դնում են նախ՝ Իրանի, ապա՝ Ռուսաստանի վրա»։
Նա նշել է. «Ուկրաինայում և Գազայում պատերազմների ընթացքը հօգուտ Իրանի և Ռուսաստանի է, և Արևմտյան Ասիայում ճիշտ և ակտիվ կառավարման դեպքում, այդ ազդեցությունը կարող է աճել և կայունանալ նաև Կովկասում»։
Անդրադառնալով Ադրբեջանի և Հայաստանի միջև խաղաղության հաստատմանը, Զոհրեվանդը նշել է. «Լավագույն տարբերակը համաձայնության գալը և խնդիրները կարգավորելն է։ Եթե Ալիևը մի կողմ դնի ամբիցիաները, իրավիճակը կվերադառնա նորմալ ընթացքի, և խնդիրները կլուծվեն: Հակառակ դեպքում, ինչպես տեղի ունեցավ Գազայում, խաղաղության համաձայնագիրը միանշանակ փխրուն կլինի, և մենք ականատես կլինենք տարածաշրջանում ճգնաժամի նոր փուլի, քանի որ Ալիևի հաջորդ քայլը կլինի հարձակումը ՀՀ Սյունիզքի մարզի վրա: Այդ դեպքում պայմանները կփոխվեն»:
Անդրադառնալով Գազայի պատերազմի հետևանքով Բաքվին Իսրայելի աջակցության կրճատմանը, դիվանագետը նշել է. «Նեթանյահուին հասցված շոկը փոխանցվել է նաև Ալիևին: Մյուս կողմից, ինչպես Թուրքիան, Իսրայելը և Ադրբեջանը, մենք նույնպես տեսնում ենք, որ Էրդողանն անգործության է մատնված և շոկի մեջ է, քանի որ նրա դիրքորոշումները կեղծավոր են: Հետևաբար, Բաքուն այլևս աջակցություն չունի, քանի որ ամերիկացիները, եվրոպացիներն ու ՆԱՏՕ-ն լիովին պաշտպանում են Նեթանյահուին, իսկ վերջինս միջոցներ չունի Բաքվին պաշտպանելու համար»։
Խոսելով «Զանգեզուրի միջանցքի» մասին, Զոհրեվանդն ասել է. «Այս հարցի լուծումը պահանջում է աշխարհաքաղաքական որոշումներ և փոփոխություններ։ Առանց այդ փոփոխությունների և այն իրավիճակում, եթե միջանցքի հարցը շարունակի բարձրացվել, նրանք փորձելու են ամեն առիթով ձևավորել աշխարհի թուրքերի միություն: Վերջին օրերին Ղազախստան ու Ղրղզստան կատարած ուղեւորությունների ընթացքում Էրդողանը թարգմանչի միջոցով հյուրընկալ կողմերին ներկայացրեց իր անհիմն դիրքորոշումները»:
