Կովկասում ռուսական շահերին վնասելու փորձերը ինքնասպանություն են. ԵՄ-ում ՀՀ դեսպան
Եվրամիությունում Հայաստանի Հանրապետության դեսպան Տիգրան Բալայանը ինքնասպանություն է որակել Հարավային Կովկասում ռուսական շահերին վնասելու փորձերը։ Այս մասին նա հայտարարել է Politico-ին տված հարցազրույցում։
Նա ընդգծել է, որ Հայաստանի արտաքին քաղաքականության շրջադարձը, որը հանգեցրեց Եվրամիության հետ հարաբերությունների ամրապնդմանը, վտանգ չի ներկայացնում Մոսկվայի համար։
«Հայաստանի աշխարհագրությունը ենթադրում է բազմաթիվ պատմական և գործնական կապեր Ռուսաստանի հետ, իսկ ենթադրությունները, թե Հայաստանը կգնա ինքնասպանության՝ փորձելով խաթարել ռուսական շահերը տարածաշրջանում, ֆանտաստիկայի ժանրից են», - ասել է Տիգրան Բալայանը։
Հավելել է, որ Հայաստանի և ԵՄ հարաբերությունները հիմնված են ազգային շահերի վրա, և ներկայումս այդ շահերը պահանջում են օրինակելի հարաբերություններ ԵՄ-ի և նրա բոլոր անդամների հետ։
«Դրանք չեն բացառում Ռուսաստանի հետ երկկողմ լավ հարաբերությունները, և սա այն է, ինչ մենք ցանկանում ենք բացատրել մեր ռուս գործընկերներին»,- ընդգծել է նա։
Հավելենք, որ վերջին ժամանակներում հայ–ռուսական հարաբերությունները սրվել են։ Միմյանց հասցեին մեղադրական ելույթներով են հանդես գալիս բարձրաստիճան պաշտոնյանները։ ՀՀ վարչապետը նաև հայտարարել է, որ Հայաստանը սառեցնում է իր մասնակցությունը ՀԱՊԿ–ին։
