«Հարավկովկասյան երկաթուղու» կոնցեսիոն պայմանագրում փոփոխություններ կլինեն. քննարկում
«Հարավկովկասյան երկաթուղի» ՓԲԸ–ի Կոնցեսիոն պայմանագրում մի շարք փոփոխություններ և լրացումներ կլինեն։ Այս մասին նշվել է ՀՀ ՏԿԵ (տարածքային կառավարման և ենթակառուցվածքների) նախարարի տեղակալ Արմեն Սիմոնյանի և «Ռուսական երկաթուղիներ» ԲԲԸ–ի գլխավոր տնօրենի տեղակալ, «Հարավկովկասյան երկաթուղի» ՓԲԸ–ի տնօրենների խորհրդի նախագահ Վյաչեսլավ Պավլովսկու գլխավորած պատվիրակության հանդիպմանը։
Տեղեկությունը հայտնում է ՏԿԵն մամուլի ծառայությունը։
Նշվում է, որ հանդիպմանը խոսվել է նաև երկաթուղու աշխատանքի բարելավմանն ուղղված միջոցառումների իրականացման անհրաժեշտության մասին, համաձայնեցվել են մի շարք դրույթներ։
«Արմեն Սիմոնյանը շնորհակալություն է հայտնել Վյաչեսլավ Պավլովսկուն՝ մայիսին Դեբեդ գետի վարարման հետևանքով վնասված երկաթուղու աշխատանքն արագ վերականգնելու հարցում երկաթուղայինների կատարած պրոֆեսիոնալ աշխատանքի համար»,– ասված է հաղորդագրության մեջ։
Ռուսական պատվիրակության կազմում էին նաև «Հարավկովկասյան երկաթուղու» գլխավոր տնօրեն Ալեքսեյ Մելնիկովը, «Ռուսական երկաթուղիներ» ԲԲԸ-ի (Բաց բաժնետիրական ընկերություն) և ՀԿԵ ՓԲԸ–ի, ինչպես նաև ՌԴ դեսպանատան ներկայացուցիչներ։
Հիշեցնենք` Հայաստանի երկաթուղային ենթակառուցվածքը կոնցեսիոն կառավարման հանձնվեց ՀԿԵ-ին 2008թ.փետրվարին: Կոնցեսիոն կառավարման ժամկետը 30 տարի է՝ ևս 10 տարով երկարաձգելու իրավունքով։
