Բագրատ սրբազանը հրաժարվեց դատախազության ինչ–որ ներկայացուցչի հետ հանդիպումից

Շարժման անդամներն ու աջակիցները ՀՀ դատախազության շենքի մոտ են եկել և հանդիպում են պահանջում գլխավոր դատախազ Աննա Վարդապետյանի հետ։ «Սրբազան պայքար» շարժման առաջնորդ Բագրատ սրբազանը հրաժարվեց դատախազության ինչ–որ ներկայացուցչի հետ հանդիպումից։

Բագրատ սրբազանը հայտարարեց, որ դատախազության ինչ–որ ներկայացուցիչ պատրաստ է ընդունարանում ընդունել «Սրբազան պայքար» շարժման մասնակիցներին, բայց առանց ԶԼՄ–երի։

«Թույլ տվեք չծիծաղել։ Սա ձև չէ շփման, այս մարդիկ երես առ երես շփման դժվարություններ ունեն»,– ընդգծեց նա։

Սրբազանը հավելեց, որ այսօրվա ընդունարանն այն տեղն է, որտեղ այս պահին բողոքի ակցիա է անցկացվում, իսկ ընդունողն էլ իրենք են։

«Հետևաբար, եթե պաշտոնյայի, ծառայողի գիտակցությունն ունեք, ուրեմն վար իջեք ու պատասխանը տվեք այն հարցրերի, որոնք մենք այստեղ ներկայացրել ենք։ Այս գործերն ուղղված են հենց ՀՀ գլխավոր դատախազին, ու նա հենց պետք է պատասխանի։ Մենք սպասում ենք հենց նրան»,– հայտարարեց Բագրատ սրբազանը։

Նշենք, որ «Սրբազան պայքար» շարժումը պահանջում է երկու քրեական գործ հարուցել, մեկը` ՀՀ վարչապետ Նիկոլ Փաշինյանի, մյուսը` ՀՀ Սահմանադրական դատարանի որոշման դեմ։

Հիշեցնենք` Բագրատ սրբազանն ապրիլից ակտիվ գործունեություն էր իրականացնում Տավուշի մարզում, ապա Երևանում ու ՀՀ տարբեր մարզերում` պահանջելով ՀՀ վարչապետ Նիկոլ Փաշինյանի հրաժարականը։ Հավաքների ակտիվությունը նվազեց ԱԺ–ի շենքի մոտ հունիսի 12-ին տեղի ունեցած բախումներից հետո։