Մոլդովան կարող է արգելել հայկական ավիաընկերության գործունեությունը
Մոլդովայի ենթակառուցվածքների նախարարությունը կազմել է այն ավիաընկերությունների ցանկը, որոնց գործունեությունը երկրում կարող է արգելվել։
Ցանկում ներառված են ընկերություններ մի քանի երկրներից, այդ թվում՝ Ռուսաստանից, Հայաստանից, Աֆղանստանից, Տանզանիայից և Իրանից, հաղորդում է NewsMaker-ը։
Նախագիծը հանրային քննարկման է ներկայացված մինչեւ հունվարի 9-ը։
Նախարարությունը հանրային քննարկման է ներկայացրել «Մոլդովայի տարածքում շահագործման արգելման ենթակա ավիափոխադրողների ցանկի հաստատման մասին» նախագիծը։ Դրա նպատակն է ազգային օրենսդրությունը համապատասխանեցնել Եվրամիության չափանիշներին:
Ցանկում ներառված են մի քանի երկրների ավիաընկերություններ, այդ թվում՝ Ռուսաստանից, Հայաստանից, Աֆղանստանից, Ղրղզստանից, Տանզանիայից, Կոնգոյից, Իրանից, Լիբիայից և Սուդանից։ Մասնավորապես, սահմանափակումների կարող է ենթարկվել Flyone Armenia-ն՝ մոլդովական FlyOne ավիաընկերության դուստր ձեռնարկությունը։
Ինչպես պարզաբանվում է նախագծում, այս ցանկում ընդգրկված ավիաընկերություններին կարող են թույլատրել թռիչքներ իրականացնել, եթե նրանք օգտագործեն արգելքի տակ չգտնվող ավիափոխադրողից վարձակալած ինքնաթիռ։ Ընդ որում, պետք է պահպանվեն անվտանգության համապատասխան ստանդարտները:
news.am