ՌԴ բանկերը կկարողանան իրենց կանոնադրական կապիտալը համալրել նաև ՀՀ դրամով

ՌԴ բանկերը կկարողանան իրենց կանոնադրական կապիտալը համալրել նաև հայկական դրամով` ի թիվս ԵԱՏՄ և ԲՐԻԿՍ երկրների արժույթների։ Նման օրինագծին հավանություն է տվել ՌԴ Դաշնության խորհուրդը։

Ըստ օրինագծի` ՌԴ կենտրոնական բանկը տարեկան կտրվածքով կսահմանի նշված նպատակի համար թույլատրելի արժույթների ցանկը, ընդ որում` կարգավորումը կվերաբերի ոչ միայն բանկերին, այլև վարկային կազմակերպություններին և ապահովագրական ընկերություններին, ինչպես նաև ոչ պետական կենսաթոշակային ֆոնդերին:

Ցանկում կարող են ներառվել ԵԱՏՄ անդամ երկրների՝ Հայաստանի, Ղրղզստանի, Ղազախստանի, Բելառուսի, ԲՐԻԿՍ անդամ երկրների արժույթները, այդ թվում՝ չինական յուանը և հնդկական ռուփին, ինչպես նաև Բրազիլիայի, Հարավաֆրիկյան Հանրապետության, Արգենտինայի, Եգիպտոսի, Իրանի, Արաբական Միացյալ Էմիրությունների, Սաուդյան Արաբիայի և Եթովպիայի արժույթները:

Միևնույն ժամանակ ոչ բարեկամական պետությունների արժույթով գործող ֆինանսական կազմակերպության կանոնադրական կապիտալում ավանդների ներդրումը կարող է սահմանափակվել ամբողջությամբ կամ որոշակի մասնաբաժնով։

Փաստաթղթի ընդունման հիմնական նպատակը բարեկամ երկրների ոչ ռեզիդենտների համար Ռուսաստանի ֆինանսական շուկայի ներդրումային գրավչության բարձրացումն է, ինչպես նաև օտարերկրյա սահմանափակող միջոցներին հակազդելու հնարավորությունների ընդլայնումը, տնտեսության ապադոլարացումը:

Նշվում է նաև, որ լրացուցիչ պայմաններ կստեղծվեն անդրսահմանային հաշվարկներում ռուսական ռուբլու և ՌԴ առևտրային գործընկեր հանդիսացող առանձին երկրների ազգային արժույթների օգտագործմանը անցնելու համար:

arm.sputniknews