Մայր աթոռը դատապարտել է Ադրբեջանի հոգևոր առաջնորդի սադրիչ հայտարարությունները
Մայր աթոռ Սուրբ Էջմիածինն արձագանքել է Կովկասի մուսուլմանների վարչության նախագահ Ալլահշուքյուր Փաշազադեի հայտարարություններին, որոնք հնչել են Բաքվում կայացած Ղազիների խորհրդի նիստում։
Փաշազադեն հանդես է եկել հայ ժողովրդի և Հայ առաքելական եկեղեցու դեմ ուղղված ատելությամբ և պատմական փաստերի խեղաթյուրումներով։
Մայր աթոռն անհեթեթ է որակել նրա պնդումները, թե իբր Էջմիածնի Մայր տաճարը և այլ հայկական սրբավայրեր գտնվում են «պատմական ադրբեջանական հողերում»։
«Զավեշտալի է, երբ ժողովրդի հոգևոր առաջնորդը, որի էթնոնիմն առաջացել է միայն 1930-ականներին, փորձում է վիճարկել հազարամյակների պատմություն ունեցող հայ ժողովրդի ինքնությունը և ժառանգությունը», — ասված է հայտարարությունում։
Մայր աթոռը նշել է՝ նման կեղծարարությունները վկայում են, որ իրական սպառնալիքը տարածաշրջանի համար բխում է հենց այդ մոտեցումներից։
«Սուտն ու կեղծիքը, որքան էլ կրկնվեն, չեն կարող ճշմարտություն դառնալ», — եզրափակել է Սուրբ Էջմիածինը։
Նշենք, որ ավելի վաղ Ալլահշուքյուր Փաշազադեի հայտարարությունները և այսպես կոչված «Երևանի մասնաճյուղի» ստեղծումը քննադատել էր նաև Արցախի պահպանության կոմիտեն և կոչ արել միջազգային հանրությանը չանտեսել այդ բացահայտ ատելության քարոզը։
arm.sputniknews
