Մենք վերադարձնելու ենք Լեռնային Ղարաբաղը․ ՀՅԴ համահայկական համաժողովի պատասխանատու
Լեռնային Ղարաբաղի վերադարձը կլինի, ռազմագերիների վերադարձը կլինի, մենք ժողովրդին կվերադարձնենք հույսն ու հավատը, դա պետք է անի ՀՅԴ երիտասարդությունը։
Այս մասին հուլիսի 15-ին կուսակցության 12-րդ Համահայկական երիտասարդական և ուսանողական հավաքի բացման արարողության ժամանակ հայտարարել է միջոցառման անցկացման պատասխանատու, հասարակական գործիչ Մհեր Ղարաղաշյանը։
Ըստ նրա՝ միջոցառումը կոչված է Հայաստանը, Լեռնային Ղարաբաղը և սփյուռքը միավորելուն,ինչպես նաև անցյալի, ներկայի և ապագայի միջև կապ հաստատելուն։
Նա հավելել է, որ ՀՅԴ-ն իր 135-ամյա պատմության ընթացքում չի կորցնում վճռականությունը, ինչը նրան հայ ժողովրդի իրավունքների համար պայքարում առաջատար ուժ է դարձնում։ «Մենք պետք է իրականացնենք իսկական Հայաստանի հայեցակարգը, շեշտում եմ՝ իսկական Հայաստանի, իրական, այլ ոչ թե այլասերված ժողովրդավարության գաղափարը», - ընդգծել է Ղարաղաշյանը։
