Տոկաևը Փաշինյանին է հանձնել Ղազախստանի բարձրագույն պետական մրցանակը
Ղազախստանի նախագահ Կասիմ-Ժոմարտ Տոկաևը Հայաստանի վարչապետ Նիկոլ Փաշինյանին պարգևատրել է «Ալտին Կիրան» («Ոսկե արծիվ») շքանշանով՝ երկրի բարձրագույն պետական պարգևով։ Այս մասին հայտնում է Sputnik Ղազախստանը։
Պարգևատրման արարողության ժամանակ իր ելույթում Տոկաևը Փաշինյանին անվանել է իսկական համազգային առաջնորդ՝ նշելով նրա ներդրումը Հայաստանի կայուն զարգացման, միջազգային հեղինակության ամրապնդման և Ադրբեջանի հետ խաղաղ գործընթացի առաջմղման գործում:
Նա ընդգծել է, որ Հայաստանի և Ղազախստանի միջև հարաբերությունները դուրս են գալիս ռազմավարական գործընկերության մակարդակի:
Ի նշան երկկողմ համագործակցության զարգացման գործում Փաշինյանի դերի՝ Տոկաևը նրան հանձնել է Ղազախստանի բարձրագույն պետական պարգևը:
Իր հերթին Փաշինյանը շնորհակալություն է հայտնել Կասիմ-Ժոմարտ Տոկաևին և Ղազախստանի ժողովրդին երկրի բարձրագույն պարգևի համար:
ՀՀ վարչապետն ընդգծել է, որ պարգևը կնպաստի երկկողմ հարաբերությունների և ողջ տարածաշրջանի զարգացմանը: Նա նաև նշել է, որ պարգևատրումն ընկալում է որպես հայ ժողովրդի նկատմամբ հատուկ հարգանքի նշան:
ՀՀ վարչապետ Նիկոլ Փաշինյանը նոյեմբերի 20-ին պաշտոնական այցով ժամանել է Ղազախստան: Նոյեմբերի 21-ին կայացել են Փաշինյանի բանակցությունները Ղազախստանի նախագահ Կասիմ-Ժոմարտ Տոկաևի հետ:
