Տարածաշրջանում Չինաստանի ազդեցության աճը դրական փոփոխություն է Հայաստանի համար․ քաղաքագետ
Տարածաշրջանում, և ոչ միայն մեր տարածաշրջանում, Չինաստանի ազդեցության աճը ժամանակի ընթացքում ավելի ու ավելի զգալի կդառնա. Հայաստանի և ընդհանուր առմամբ Հարավային Կովկասի համար սա դրական փոփոխություն է։
Այս մասին դեկտեմբերի 17-ին «Չինաստանի և Հայաստանի միջև ռազմավարական գործընկերության ամրապնդում. երկխոսություն կառավարման ոլորտում փորձի փոխանակման մասին» թեմայով գիտաժողովի ժամանակ հայտարարել է քաղաքագետ Ալեքսանդր Իսկանդարյանը:
Նա դա բացատրել է նրանով, որ որքան շատ խաղացողներ լինեն տարածաշրջանում, այնքան ավելի հանդարտ կլինի իրավիճակը, հատկապես անկայունության և երկու հարևանների՝ Թուրքիայի ու Ադրբեջանի հետ Հայաստանի փակ սահմանների պայմաններում։
Իսկանդարյանը նկատել է, որ Չինաստանը դառնում է համաշխարհային խաղացող և համաշխարհային ուժ։ Նա պարզաբանել է, որ համաշխարհային ուժ է համարվում այն երկիրը, որը քո հարևանն է աշխարհի ցանկացած կետում։ «Այն, որ մենք խոսում ենք Չինաստանի հետ կապերի, չինարենի, չինական գրքերի և չինական մշակույթի մասին, հենց դրա վկայությունն է. դա ցույց է տալիս, որ Չինաստանը մեր հարևանն է», - ընդգծել է փորձագետը։
Նրա գնահատմամբ՝ Չինաստանը տարբերվում է մյուս խոշոր ուժերից (ԱՄՆ, Եվրոպա, Ռուսաստան) նրանով, որ չի ասում, թե դու պետք է դառնաս «փոքր Չինաստան» և ապրես այնպես, ինչպես ապրում է Չինաստանը, այլ առաջարկում է համագործակցություն կատարել։
