Էքսկլավային գյուղերի հարցերը կլուծվեն. Բայրամովը` Հայաստանի հետ սահմանազատման մասին
Էքսկլավային գյուղերի հարցերը կլուծվեն սահմանազատման գործընթացի շրջանակներում, լրագրողներին ասել է Ադրբեջանի արտգործնախարար Ջեյհուն Բայրամովը։
Նրա խոսքով՝ Հայաստանի և Ադրբեջանի միջև սահմանազատման և սահմանագծման աշխատանքները շարունակվում են։
«Այդ աշխատանքը շարունակվում է պարբերաբար։ Մենք արդեն ականատես ենք դարձել տարվող աշխատանքի առաջին դրական արդյունքներին. սահմանազատվել է պետական սահմանի մոտ 13 կմ-ը»,– ասել է Ադրբեջանի նախարարը։
Նա նշել է, որ կողմերի միջև որոշակի համաձայնություններ են ձեռք բերվել, սահմանազատման գործընթացը կշարունակվի հյուսիսից հարավ։
«Գործընթացն իրականացվելու է, էքսկլավային գյուղերի հարցերը կգտնեն իրենց լուծումը», – ասել է Բայրամովը։
Ավելի վաղ ՀՀ վարչապետ Նիկոլ Փաշինյանը հայտարարել էր, որ անկլավների և էքսկլավների թեմայի վերաբերյալ որևէ հայեցակարգ դեռ չկա։ Նա նշել է, որ հարցը դիտարկում է ինքնիշխան տարածքները Հայաստանին վերադարձնելու տեսանկյունից։ Միևնույն ժամանակ, ՀՀ վարչապետը հայտարարեց, որ սահմանազատման և սահմանագծման գործընթացում հնարավոր է համարում որոշակի օպտիմալացում՝ չպարզաբանելով, թե ինչ է դրա տակ ենթադրում։
