Այսօր Երևանում կկայանա ՀԱՊԿ ՀԱԽ նստաշրջանը

Հոկտեմբերի 14-ին Երևանում կկայանա Հավաքական անվտանգության պայմանագրի կազմակերպության (ՀԱՊԿ) Հավաքական անվտանգության խորհրդի նստաշրջանը, որը կվարի խորհրդում 2015-2016թթ. նստաշրջանների միջև ընկած ժամանակահատվածում նախագահությունն ստանձնած Հայաստանի Նախագահ Սերժ Սարգսյանը:

Նիստի ընթացքում նախատեսվում է քննարկել Անկախ պետությունների համագործակցության (ԱՊՀ) գոտում առկա իրավիճակը, ինչպես նաև կազմակերպության՝ կոլեկտիվ անվտանգության հետագա կատարելագործման հարցերը:

ՀԱՊԿ-ի հավաքական անվտանգության խորհրդի (ՀԱԽ) նստաշրջանում քննարկվելու է մինչև 2025 թվականը հավաքական անվտանգության և ՀԱՊԿ-ի ճգնաժամային արձագանքման կենտրոնի ստեղծման ռազմավարությունը, ինչպես նաև ՀԱՊԿ-ի ձևաչափում ահաբեկչական ճանաչված կազմակերպությունների միասնական ցուցակի ձևավորման նախագիծը:

Բացի այդ, ՀԱՊԿ անդամ պետությունների ղեկավարները Հավաքական անվտանգության խորհրդի նստաշրջանում որոշում կընդունեն գլխավոր քարտուղարի պաշտոնի թեկնածուի վերաբերյալ:

ՀԱԽ-ի նստաշրջանին մասնակցելու համար Հայաստան կժամանեն ՀԱՊԿ անդամ երկրների նախագահները՝ Ռուսաստանի նախագահ Վլադիմիր Պուտինը, Ղրղըզստանի նախագահ Ալմազբեկ Աթամբաևը, Բելառուսի նախագահ Ալեքսանդր Լուկաշենկոն, Տաջիկստանի նախագահ Էմոմալի Ռահմոնին:

Ղազախստանի նախագահ Նուրսուլթան Նազարբաևը չեղարկել է այցը Հայաստան: Ղազախական կողմը պաշտոնապես տեղեկացրել է, որ նախագահը մրսածություն ունի և չի կարող մասնակցել ՀԱԽ նիստին: ՀԱԽ նիստին Ղազախստանից կմասնակցի երկրի վարչապետ Բակիջան Սագինտաևը:

Հիշեցնենք, որ այս տարվա ապրիլի 8-ին նախատեսված Եվրասիական տնտեսական միության անդամ երկրների վարչապետների հավաքը Երևանում չկայացավ, որովհետև միության 5 անդամներից մեկը՝ Ղազախստանը, հրաժարվել էր Երևանում մասնակցել այս նիստին:

Նշենք, որ ՀԱՊԿ կազմի մեջ մտնում են Հայաստանը, Բելառուսը, Ղազախստանը, Ղրղըզստանը, Ռուսաստանը և Տաջիկստանը։

Հավաքական անվտանգության խորհրդի նիստին ընդառաջ, Հայաստանի արտաքին գործերի նախարարությունում տեղի կունենա կազմակերպության Արտգործնախարարների խորհրդի, Պաշտպանության նախարարների խորհրդի և Անվտանգության խորհուրդների քարտուղարների կոմիտեի համատեղ նիստը:

Նախքան այդ, հոկտեմբերի 13-ին Երևանում բացվել էր սպառազինությունների և պաշտպանական տեխնոլոգիաների ArmHiTec-2016 միջազգային ցուցահանդեսը, որին մասնակցում էին ՀՀ և ՀԱՊԿ անդամ երկրների բարձրաստիճան պաշտոնյաներ:

Tert.am