Ռոհանի.«Եթե Միացյալ Նահանգները վախենում է կրակից, ապա թող չվառի այն»
Նշելով, որ Համատեղ գործողությունների համապարփակ ծրագիրը բխում է բոլոր ժողովուրդների , տարածաշրջանի ու աշխարհի շահերից, ԻԻՀ նախագահ Հասան Ռոհանին ասել է.«Եթե Միացյալ Նահանգները վախենում է կրակից, ապա թող չվառի այն և հարգի ՄԱԿ-ի Անվտանգության Խորհրդի որոշումը»:
Չորեքշաբթի օրը կայացած կառավարության նիստում, անդրադառնալով ԱՄՆ նախագահի հայտարարությանն, առ այն որ Իրանը կրակի հետ է խաղում, Հասան Ռոհանին հավելել է.«Ամերիկացիներն արդեն մեկ տարի է, որ տարածաշրջանում սկսել են կրակի հետ խաղ անել: Այն դեպքում երբ իրենք միլիտարիստական քայլեր են իրականացնում, հայտարարում են, որ կրակի հետ խաղալը վտանգավոր է»:
Նշելով, որ միջուկային գործարքը կնքած մյուս երկրներն Իրանին հորդորում են մնալ Համատեղ գործողությունների համապարփակ ծրագրում, Ռոհանին հստակեցրել է.«Եթե ՀԳՀԾ-ի մյուս կողմերը իրենց պարտավորությունները չկատարեն, ապա Իսլամական հանրապետությունն ինչպես ավելի վաղ հայտարարել է, եվրոպական երկրներին տրամադրած 60-օրյա ժամկետն ավարտվելուց հետո, կկատարի հաջորդ քայլերը»:
Քննադատելով ՀԳՀԾ-ի նկատմամբ ԱՄՆ-ի ու Եվրոպայի երկստանդարտ վերաբերմունքը, Ռոհանին ասել է.«Եթե ՀԳՀԾ-ն լավ համաձայնություն է, ապա ինչու Եվրոպան ու Միացյալ Նահանգները չեն կատարում իրենց պարտավորությունները և եթե վատ համաձայնություն է, ապա ինչու երբ Իրանը պատրաստվում է դադարեցնել իր պարտավորությունների մի մասի կատարումն աղմուկ են բարձրանում աշխարհով մեկ»:
Անդրադառնալով 1988 թվականի հուլիսի 3-ին ամերիկյան Վինսենս ռազմանավի կողմից Իրանի մարդատար ինքնաթիռի վրա իրականացված հարձակման տարելիցին, Ռոհանին ասել է.«Իրանի մարդատար ինքնաթիռի վրա հարձակումը ցույց տվեց,որ հանցագործությունը հեշտ է ամերիկացիների համար»:
