Իրանն արձագանքել է Ադրբեջանի նախագահի կտրուկ հայտարարություններին
Արձագանքելով Հայաստանին Իրանի աջակցության վերաբերյալ Ադրբեջանի նախագահ Իլհամ Ալիևի վերջին հայտարարությանն ԻԻՀ ԱԳՆ խոսնակը ասել է. «Թեհրանի սկզբունքային քաղաքականությունը հիմնված է բարիդրացիության և բոլոր հարևանների հետ հարաբերությունների ընդլայնման վրա: Սակայն մի հարևանի հետ հարաբերությունների ամրապնդումը որևէ կերպ ուղղված չէ մյուս հարևանի դեմ»:
Անդրադառնալով Լեռնային Ղարաբաղի տարածաշրջանում իր երկու հյուսիսային հարևանների երկարատև հակամարտության վերաբերյալ Իրանի դիրքորոշմաը, Նասեր Քանանին նշել է. «Թեհրանը մշտապես ընդգծել է Հայաստանի ու Ադրբեջանի տարածքային ամբողջականության պահպանման և օրենքի ու միջազգային իրավունքի շրջանակներում երկու երկրների միջև վեճերի խաղաղ կարգավորման անհրաժեշտությունը»։
ԻԻՀ ԱԳՆ խոսնակը նշել է, որ Ադրբեջանի հետ սահմանին ԻՀՊԿ վերջին զորավարժությունները ծրագրված են եղել նախապես և նախքան դրանց անցկացումը հարևանները պաշտոնապես տեղեկացվել են այդ մասին:
Քանանին հավելել է. «Կովկասի խնդիրների լուծման ուղին անցնում է ոչ թե արտաքին ուժերի, այլ տարածաշրջանի երկրների մայրաքաղաքներով: Իրանի ևս մեկ անգամ իր պատրսատակամությունն է հայտնում՝ Թեհրանում երկկողմ, եռակողմ և վեցակողմ տարածաշրջանային նախաձեռնությունների միջոցով աջակցելու երկու հյուսիսային հարևանների միջև առկա խնդիրների լուծմանը»։
