Շվեդիայում հերթական անգամ անարգել են Ղուրանը
Շվեդիայում Ղուրանն անարգելու հերթական ակցիայից հետո, Իրանում այդ երկրի դեսպանը կանչվել է ԱԳՆ:
Սիլվան Մոմիկան, ով նախկինում նույնպես ոստիկանության թույլտվությամբ իրականացրել էր ակցիա, որի ժամանակ այրել էր Ղուրանը, հերթական անգամ, Ստոկհոլմում Իրաքի դեսպանատան դիմաց, անարգել է Ղուրանը:
Արձագանքելով այս քայլին, ԻԻՀ ԱԳՆ խոսնակ Նասեր Քանանին հայտարարել է. «Մենք խստորեն դատապարտում ենք Շվեդիայում սուրբ Ղուրանի և իսլամական սրբությունների անարգումը և այդ երկրի կառավարությանը լիովին պատասխանատու ենք համարում ամբողջ աշխարհում մուսուլմանների զգացմունքները բորբոքելու հետևանքների համար: Իսլամական սրբություններն անարգելը և ատելություն տարածելը բռնության դրսևորում է և թշնամական գործողություն աշխարհի երկու միլիարդ մուսուլմանների նկատմամբ»:
Ավելի վաղ Իրաքի վարչապետը արտաքին գործերի նախարարությանը հանձնարարել էր Ստոկհոլմից հետ կանչել Իրաքի դեսպանատան գործերի ժամանակավոր հավատարմատարին։ Իրաքի կառավարությունը Բաղդադում Շվեդիայի դեսպանից պահանջել է լքել այդ երկրի տարածքը։
