Նյու Յորքում կայացել է Իրանի և Սաուդյան Արաբիայի արտաքին գործերի նախարարների հանդիպումը
ԻՌՆԱ-ի հաղորդմամբ՝ Նյու Յորք կատարած իր այցի վեցերորդ օրն Իրանի ԱԳ նախարար Ամիր Աբդոլլահյանը հանդիպել է Սաուդյան Արաբիայի ԱԳ նախարար Ֆեյսալ բին Ֆարհանի հետ։
Հանդիպմանը կողմերը գոհունակություն են հայտնել դեսպանատների վերաբացման և հարաբերությունների նոր փուլ թևակոխելու երկու երկրների վճռականության շրջանակում Թեհրանում և Էր Ռիադում դեսպանների նշանակման կապակցությամբ:
Ամիր Աբդոլլահյանն այս հանդիպմանն ասել է. «Սաուդյան Արաբիայի թագաժառանգի հետ հանդիպման ժամանակ ներկայացված գաղափարի հիման վրա մենք պատրաստ ենք երկու երկրների միջև համապարփակ համագործակցության փաստաթուղթ կազմել և ստորագրել»։
Նա հավելել է. «Անհրաժեշտ է նաև ակտիվացնել երկու երկրների տնտեսական համատեղ հանձնաժողովի աշխատանքը՝ տարբեր, հատկապես տնտեսական և առևտրային ոլորտներում հարաբերությունները ընդլայնելու նպատակով»:
Հանդիպմանը Սաուդյան Արաբիայի արտաքին գործերի նախարարը գոհացուցիչ է համարել երկու երկրների հարաբերությունների առաջընթացը, հավելելով, որ հարաբերություններում նոր հորիզոններ են նախանշվել:
Ֆեյսալ բեն Ֆարհանը, հայտարարելով երկկողմ համագործակցությունն ամրապնդելու և առաջարկված գաղափարներն իրագործելու իր երկրի ցանկության մասին, Իրանի և Սաուդյան Արաբիայի ղեկավարների հանդիպումը գնահատել է որպես համագործակցության ամրապդնման հիմք։