Իրանը դատապարտել է ԱՄՆ-ի կողմից Վենեսուելայի  Citgo  նավթավերամշակման գործարանի առգրավումը

ԻԻՀ ԱԳՆ խոսնակը հակաօրինական է համարել ԱՄՆ-ի կողմից Վենեսուելայի   գույքի և ակտիվների մաս համարվող  Citgo  նավթավերամշակման գործարանի բաժնետոմսերի առգրավումը և վաճառքը, նշելով, որ դա միջազգային իրավունքի խախտում է։

ԻՌՆԱ-ի հաղորդմամբ՝ Նասեր Քանանին ասել է․ «ԱՄՆ-ի դաժան ու միակողմանի պատժամիջոցների նկատմամբ Վենեսուելայի դիմակայությունը, որը   միջազգային շրջանակներում այդ երկրի դեմ ուղղված Վաշինգտոնի քաղաքական ծրագրերի ձախողման պատճառ է դարձել, Նահանգներին ստիպել է վրեժխնդիր լինել և գողանալ այս երկրի ունեցվածքը։

Նա նշել է, որ Իրանն աջակցում է Վենեսուելայի կառավարությանն ու ժողովրդին՝ իրենց  օրինական իրավունքները պաշտպանելու հարցում։

Վենեսուելայի կառավարությունը նույնպես պաշտոնական հայտարարությամբ խստորեն դատապարտել է դատական գործընթացի արդյունքում Citgo ընկերության բաժնետոմսերի հարկադիր վաճառքը, նշելով, որ դա անօրինական է։

Հայտարարության մեջ ասվում է, որ Վենեսուելայի հակակառավարական և Վաշինգտոնի պատվերները սպասարկող տարրերի հետ  համակարգված կերպով արված այս քայլը խախտում է երկրների միջև խաղաղ գոյակցությունը կարգավորող նորմերը։