Իրանում մշակվել է դիաբետով հիվանդների մոտ նյարդային ցավերը հանգստացնող հավելում
Իրանցի մասնագետները մշակել են հավելում, որը կարող է օգնել հանգստացնել դիաբետով հիվանդների մոտ առաջացող նյարդային ցավերը։
Հավելումն արտադրվում է դեղահաբերի տեսքով։ Այն կարող են ընդունել բոլոր նրանք, ովքեր ներարկումների հետ կապված խնդիրներ ունեն։
Pars Today-ի փոխանցմամբ՝ հավելումն արտադրող ընկերության գործադիր տնօրեն Ռոքսանա Քիան ասել է. «Այս հավելումը կօգնի լուծել դիաբետ ունեցող հիվանդների մտահոգությունների մի մասը»։
Նշելով, որ հավելումը ներառում է B խմբի վիտամինի բաղադրիչներ, նա հավելել է․ «Բացի շաքարային դիաբետով հիվանդներից, 65 տարեկանից բարձր մարդիկ, ստամոքս-աղիքային վիրահատությունների ենթարկված հիվանդները և բուսակերները նույնպես կարող են օգտվել մեր արտադրանքից»։
Նշենք, որ Իրանն աշխարհում յոթերորդ տեղն է զբաղեցնում մի շարք հիվանդությունների համար անհրաժեշտ դեղամիջոցների արտադրությամբ։
Չնայած ԱՄՆ պատժամիջոցներին և միջազգային ճնշումներին՝ Իրանը, հենվելով երիտասարդ մասնագետների ու գիտնականների ներուժի վրա, հաղթահարել է խոչընդոտները և գրանցել մեծ ձեռքբերումներ։