Կայացել է տիեզերական բնագավառում Իրանի երեք նվաճումների շնորհանդեսը
ԻԻՀ նախագահը տիեզերական տեխնոլոգիայի օրվա հանդիսության ժամանակ ներկայացրել է «Նահիդ 1» և «Ամիր Քաբիրի ուղերձը» արբանյակներն ու «Սաման 1» ուղեծիր փոխադրող համակարգը:
«Նահիդ 1»-ն Իրանի հեռահաղորդակցական առաջին արբանյակն է, որը նախագծվել ու արտադրվել է Իրանի տիեզերական հետազոտությունների կենտրոնի արբանյակային համակարգերի հետազոտության բաժնում:
«Ամիր Քաբիրի ուղերձը» արբանյակը նախագծվել ու արտադրվել է «Ամիր Քաբիր» արդյունաբերական համալսարանում:
Ուղեծիր փոխադրող համակարգը նախագծվել ու արտադրվել է Իրանի տիեզերական հետազոտությունների կենտրոնի տիեզերական փոխադրման համակարգերի հետազոտական բաժնում և կարող է արբանյակները Երկրի ներքևի ուղեծիրներից տեղափոխել վերին ուղեծիրներ:
Չորեքշաբթի օրը, տիեզերական տեխնոլոգիայի օրվա 9-րդ տարեդարձի կապակցությամբ ԻԻՀ նախագահ Հասան Ռոհանին այցելել է Իրանի տիեզերական հետազոտությունների կենտրոնի նվաճումների ցուցահանդես:
Բահմանի 14-ն ԻԻՀ օրացույցում նշվում է որպես տիեզերական տեխնոլոգիայի ազգային օր:
Բահմանի 14-ը նշանավորվում է 2008 թվականին «Օմիդ» արբանյակի տիեզերք ուղարկվելով, որի արդյունքում էլ Իրանը միացավ արբանյակ արձակելու կարողություն ունեցող երկրների շարքին:
